പത്ത് വര്‍ഷത്തിന് ശേഷം പാക്കിസ്ഥാനിലേക്ക് ടെസ്റ്റ് ക്രിക്കറ്റ് മടങ്ങിയെത്തുമ്പോള്‍ അതിന്റെ ഭാഗമാകുവാന്‍ കഴിയുന്നത് അഭിമാന നിമിഷമായാണ് കാണുന്നതെന്ന് ശ്രീലങ്കന്‍ നായകന്‍ ദിമുത് കരുണാരത്നേ. താന്‍ പാക്കിസ്ഥാനില്‍ ആദ്യമായാണ് എത്തുന്നത്, അതിന്റെ ആവേശം തീര്‍ച്ചയായും തനിക്കുണ്ട്. ഇരു ടീമുകളിലെയും ഒട്ടേറെ താരങ്ങള്‍ക്ക് പാക്കിസ്ഥാന്‍ മണ്ണില്‍ ഇത് ആദ്യ ടെസ്റ്റാണ്. ഈ മത്സരത്തില്‍ കളിക്കുവാനാകുന്നതില്‍ തന്നെ പോലെ അവര്‍ക്കും സന്തോഷമുണ്ടാകുമെന്ന് ദിമുത് വ്യക്തമാക്കി.
മുന്‍ പാക്കിസ്ഥാന്‍ കോച്ച് മിക്കി ആര്‍തര്‍ ശ്രീലങ്കയുടെ കോച്ചായി എത്തുന്നു എന്നത് തങ്ങളുടെ ടീമിന് ഗുണകരമായ കാര്യമാണെന്ന് കരുണാരത്നേ പറഞ്ഞു. പാക്കിസ്ഥാന്‍ ടീമിനെ അടുത്തറിഞ്ഞ വ്യക്തിയാണ് മിക്കി ആര്‍തര്‍ അതിനാല്‍ തന്നെ മിക്കി കൂടെയുണ്ടെന്നുള്ളത് ശ്രീലങ്കയുടെ ആത്മവിശ്വാസം വര്‍ദ്ധിപ്പിക്കുന്നുവെന്ന് കരുണാരത്നേ വെളിപ്പെടുത്തി.
