മലയാളിതാരം അര്‍ജ്ജുന്‍ നായരുടെ ബൗളിംഗ് മികവില്‍ മികച്ച വിജയം നേടി സിഡ്നി തണ്ടര്‍. ഇന്ന് നടന്ന ബിഗ് ബാഷ് മത്സരത്തില്‍ ആദ്യം ബാറ്റ് ചെയ്ത സിഡ്നി തണ്ടര്‍ 168/6 എന്ന സ്കോര്‍ നേടിയപ്പോള്‍ അഡിലെയ്ഡ് സ്ട്രൈക്കേഴ്സിനെ 97 റണ്‍സിനു പുറത്താക്കി ടീം 71 റണ്‍സിന്റെ വിജയം സ്വന്തമാക്കുകയായിരുന്നു.
ഷെയിന്‍ വാട്സണ്‍(68), ജേസണ്‍ സംഘ(30) എന്നിവര്‍ക്കൊപ്പം ആന്റണ്‍ ഡെവ്സിച്ച്(21), ജേയ് ലെന്റണ്‍(27) എന്നിവരുടെ ബാറ്റിംഗ് മികവിലാണ് സിഡ്നി തണ്ടര്‍ 168/6 എന്ന സ്കോറിലേക്ക് എത്തുന്നത്. ബില്ലി സ്റ്റാന്‍ലേക്ക്, റഷീദ് ഖാന്‍ എന്നിവര്‍ അഡിലെയ്ഡ് സ്ട്രൈക്കേഴ്സിനാിയ രണ്ട് വീതം വിക്കറ്റ് നേടി.
മറുപടി ബാറ്റിംഗിനിറങ്ങിയ അഡിലെയ്ഡിനായി കോളിന്‍ ഇന്‍ഗ്രാം മാത്രമാണ് തിളങ്ങിയത്. 30 പന്തില്‍ നിന്ന് 48 റണ്‍സ് നേടിയ ഇന്‍ഗ്രാമിനു പിന്തുണ നല്‍കുവാന്‍ ആര്‍ക്കും തന്നെ സാധിക്കാതെ വന്നപ്പോള്‍ 17.4 ഓവറില്‍ 97 റണ്‍സിനു ഓള്‍ഔട്ട് ആയി അഡിലെയ്ഡ് സ്ട്രൈക്കേഴ്സ് വലിയ തോല്‍വി ഏറ്റു വാങ്ങുകയായിരുന്നു.
