ഇന്ത്യയും ദക്ഷിണാഫ്രിക്കയും തമ്മിലുള്ള ടി20 പരമ്പരയിലെ അവസാന മത്സരം മഴ കാരണം ഉപേക്ഷിച്ചപ്പോള്‍ ഇരു ടീമുകളും 2-2 എന്ന സ്കോറിന് പരമ്പര പങ്കുവയ്ക്കുകയായിരുന്നു. ഇന്ത്യയ്ക്ക് വേണ്ടി മികച്ച പ്രകടനം പുറത്തെടുത്ത് നാല് ഇന്നിംഗ്സിൽ നിന്ന് 6 വിക്കറ്റ് നേടിയ ഭുവനേശ്വര്‍ കുമാര്‍ ആയിരുന്നു പരമ്പരയിലെ താരമായി തിരഞ്ഞെടുക്കപ്പെട്ടത്.
താരത്തിനെ പ്രശംസിച്ച് ദക്ഷിണാഫ്രിക്കന്‍ കോച്ച് മാര്‍ക്ക് ബൗച്ചറും രംഗത്തെത്തിയിട്ടുണ്ട്. പവര്‍പ്ലേയിലെ ഭുവിയുടെ സ്പെല്ലാണ് തന്റെ ടീമിനെ സമ്മര്‍ദ്ദത്തിലാക്കിയതെന്നാണ് ബൗച്ചര്‍ പറഞ്ഞത്.
കഴിഞ്ഞ രണ്ട് വര്‍ഷമായി പരിക്കും മോശം ഫോമും കാരണം ഭുവിയ്ക്ക് മോശം സമയം ആയിരുന്നുവെങ്കിലും ഐപിഎലില്‍ 12 വിക്കറ്റ് തന്റെ ടീമിനായി നേടിയ താരം മികച്ച പോം തുടര്‍ന്ന് ഈ ടി20 പരമ്പരയിലും മികവ് പുലര്‍ത്തി.
ദക്ഷിണാഫ്രിക്കയ്ക്കെതിരെ രണ്ടാം ടി20യിൽ വെറും 13 റൺസ് വിട്ട് നൽകി 4 വിക്കറ്റാണ് ഭുവനേശ്വര്‍ കുമാര്‍ നേടിയത്.
