സ്റ്റീവ് സ്മിത്തിനെതിരെ പന്തെറിയുവാന്‍ താന്‍ ഇനിയും മെച്ചപ്പെട്ട രീതികള്‍ കണ്ടെത്തണമെന്ന് പറഞ്ഞ് സ്റ്റുവര്‍ട് ബ്രോഡ്. സ്മിത്ത് ബൗളര്‍മാരുടെ ജീവിതം ദുരിതത്തിലാക്കുന്നുവെന്നും താരത്തിന് റണ്‍സിനോടുള്ള ദാഹം കാരണം വലിയ സ്കോറുകള്‍ നേടുകയെന്നത് വളരെ എളുപ്പമുള്ള കാര്യമാണെന്നും താരത്തിനെ പിടിച്ച് കെട്ടുവാന്‍ വലിയ പ്രയാസമാണെന്നും ബ്രോഡ് പറഞ്ഞു. നിലവില്‍ ടെസ്റ്റില്‍ ഒന്നാം റാങ്ക് ബാറ്റ്സ്മാന്‍ കൂടിയാണ് സ്റ്റീവ് സ്മിത്ത്.
എന്നാല്‍ രസകരമായ കാര്യം സ്മിത്തിന് ബ്രോഡിനെതിരെ അധികം റണ്‍സ് നേടാനായിട്ടില്ലെന്നതാണ്. സ്മിത്തിന്റെ വിക്കറ്റ് 11 തവണയെങ്കിലും ബ്രോഡ് വീഴ്ത്തുകയും ചെയ്തിട്ടുണ്ട്. ടെസ്റ്റില്‍ എട്ട് തവണയും ഏകദിനത്തില്‍ മൂന്ന് തവണയുമാണ് ഈ നേട്ടം ബ്രോഡ് സ്വന്തമാക്കിയിട്ടുള്ളത്.
ബെന്‍ സ്റ്റോക്സ് ആണ് തന്റെ ഏറ്റവും അടുത്ത ഇംഗ്ലണ്ട് ടീം മേറ്റ് എന്നും സ്റ്റുവര്‍ട് ബ്രോഡ് വ്യക്തമാക്കി. തന്റെ കരിയറില്‍ കളിച്ചിട്ടുള്ള താരങ്ങളില്‍ ഏറ്റവും മികച്ച ഇംഗ്ലണ്ട് താരവും സ്റ്റോക്സ് ആണെന്ന് ബ്രോഡ് പറഞ്ഞു. സ്റ്റോക്സിന്റെ ബലത്തിലാണ് ഇംഗ്ലണ്ട് ലോകകപ്പും ആഷസും ജയിച്ചതെന്നാണ് ബ്രോഡ് അഭിപ്രായപ്പെട്ടത്. മനസ്സിലേക്ക് ഒരു പിടി താരങ്ങള്‍ വരുന്നുണ്ടെങ്കിലും അവസാനം അത് ബെന്‍ സ്റ്റോക്സിലേക്ക് എത്തി നില്‍ക്കുമെന്നും ബ്രോഡ് വ്യക്തമാക്കി.
