നരൈന്റെ മികവില്‍ ധാക്കയ്ക്ക് തുടര്‍ച്ചയായ രണ്ടാം വിജയം

സുനില്‍ നരൈന്റെ ഓള്‍റൗണ്ട് പ്രകടനത്തിന്റെ ബലത്തില്‍ ധാക്ക ഡൈനാമൈറ്റ്സിനു വിജയം. ചിറ്റഗോംഗ് വൈക്കിംഗ്സിനെതിരെ 6 വിക്കറ്റിന്റെ വിജയമാണ് ധാക്ക സ്വന്തമാക്കിയത്. മാന്‍ ഓഫ് ദി മാച്ചായ സുനില്‍ നരൈന്‍ 4 വിക്കറ്റും 31 റണ്‍സും നേടി നടത്തിയ ഓള്‍റൗണ്ട് പ്രകടനമാണ് ടീമിനു തുണയായി മാറിയത്. ആദ്യം ബാറ്റ് ചെയ്ത വൈക്കിംഗ്സ് 135/8 എന്ന സ്കോര്‍ നേടിയപ്പോള്‍ 16.4 ഓവറില്‍ ധാക്ക 4 വിക്കറ്റ് നഷ്ടത്തില്‍ ലക്ഷ്യം മറികടന്നു.

മൊസ്ദേക്ക് ഹൊസൈന്‍(40), കാമറൂണ്‍ ഡെല്‍പോര്‍ട്ട്(36), ശദ്മാന്‍ ഇസ്ലാം(24) എന്നിവരുടെ പ്രകടനത്തിലൂടെയാണ് ചിറ്റഗോംഗ് വൈക്കിംഗ്സ് 135/8 എന്ന സ്കോര്‍ നേടിയത്. സുനില്‍ നരൈന്‍ നാല് വിക്കറ്റും റൂബല്‍ ഹൊസൈന്‍, ഖാസി ഒനിക് എന്നിവര്‍ ഓരോ വിക്കറ്റും ടീമിനായി നേടി.

ടോപ് ഓര്‍ഡറില്‍ ഉപുല്‍ തരംഗയും സുനില്‍ നരൈനും കൂടി നല്‍കിയ തുടക്കമാണ് ധാക്കയുടെ വിജയത്തിനു അടിത്തറയായി മാറിയത്. നരൈന്‍ 16 പന്തില്‍ 31 റണ്‍സ് നേടി പുറത്തായപ്പോള്‍ ഉപുല്‍ തരംഗ തന്റെ അര്‍ദ്ധ ശതകം പൂര്‍ത്തിയാക്കി. 51 റണ്‍സ് നേടിയാണ് താരം പുറത്തായത്. റോണി താലുക്ദാര്‍, നുരൂള്‍ ഹസന്‍(20*) എന്നിവരും ശ്രദ്ധേയമായ പ്രകടനം നടത്തി. ഖലീല്‍ അഹമ്മദ് മൂന്ന് വിക്കറ്റ് നേടി ചിറ്റഗോംഗ് ബൗളര്‍മാരില്‍ തിളങ്ങി.