ലോകകപ്പിനൊപ്പം ആഷസും നേടിയാല്‍ ഇംഗ്ലണ്ടിന്റെ ഏറ്റവും മികച്ച ക്രിക്കറ്റ് കാലമാകും അത്

ഇംഗ്ലണ്ടിന്റെ ക്രിക്കറ്റിന്റെ ഉയരങ്ങളുടെ കൊടുമുടി കീഴടക്കുന്ന പ്രതീതിയാകും ലോകകപ്പിനൊപ്പം ആഷസ് കിരീടവും നേടാനായാലെന്ന് പറഞ്ഞ് ഇംഗ്ലണ്ട് ടെസ്റ്റ് നായകന്‍ ജോ റൂട്ട്. ലോകകപ്പ് വിജയിച്ച് അധികം വൈകാതെ തന്നെ ആഷസിനായി ഇംഗ്ലണ്ട് ഇറങ്ങുകയാണ്. കഴിഞ്ഞ കുറേ കാലമായി മോശം സാഹര്യങ്ങളിലൂടെ കടന്ന് പോകുന്ന ഓസ്ട്രേലിയയ്ക്കെതിരെയാണെങ്കിലും ആഷസില്‍ തങ്ങളുടെ വര്‍ദ്ധിത വീര്യത്തോടെയാവും കംഗാരുക്കള്‍ മത്സരിക്കാനെത്തുന്നത്. ഇംഗ്ലണ്ടിന്റെ ടെസ്റ്റ് നായകന്‍ ജോ റൂട്ട് ആഷസിന് മുമ്പ് അയര്‍ലണ്ടിനെതിരെയുള്ള ഏക ടെസ്റ്റില്‍ കളിക്കുമെന്ന് ഉറപ്പാണെങ്കിലും മറ്റ് താരങ്ങള്‍ക്ക് വിശ്രമം നല്‍കിയേക്കുമെന്നാണ് കരുതപ്പെടുന്നത്.

ലോകകപ്പ് വിജയത്തോടൊപ്പം ആഷസും സ്വന്തമാക്കാനായില്‍ ഇംഗ്ലണ്ട് ക്രിക്കറ്റിന്റെ ഉച്ഛസ്ഥായിയിലുള്ള സംഭവമായിരിക്കും ഇതെന്ന് ജോ റൂട്ട് വ്യക്തമാക്കി. എല്ലാവരും ആവേശത്തിലാണെങ്കിലും ആഷസിനുള്ള എല്ലാ തയ്യാറെടുപ്പുകളും ഇംഗ്ലണ്ട് നടത്തിയിട്ടുണ്ടെന്ന് ജോ റൂട്ട് പറഞ്ഞു. താരങ്ങള്‍ ആഘോഷങ്ങളില്‍ മതിമറക്കുമ്പോളും പിന്നണിയില്‍ ഇതിന് വേണ്ടിയുള്ള പ്രവര്‍ത്തനങ്ങള്‍ നടക്കുന്നുണ്ട്.

ടെസ്റ്റ് ക്രിക്കറ്റിലെ ഏതൊരു പരമ്പരയെക്കാള്‍ വലുതാണ് ആഷസ്. അതിനാല്‍ തന്നെ ഞങ്ങളതിന് തയ്യാറെടുപ്പുകള്‍ നടത്തിയിരിക്കുമെന്നും ജോ റൂട്ട് വ്യക്തമാക്കി.