രണ്ട് വര്‍ഷത്തെ നീണ്ട ഇടവേളയ്ക്ക് ശേഷം വെസ്റ്റിന്‍ഡീസിനായി കളിക്കാനിറങ്ങിയ ആന്‍ഡ്രേ റസ്സൽ ഇന്നലത്തെ മത്സരത്തിൽ കളിയിലെ താരമായി മാറുകയായിരുന്നു. തനിക്ക് ടീമിലേക്ക് വിളി വന്നപ്പോള്‍ താന്‍ മാന്‍ ഓഫ് ദി മാച്ച് അവാര്‍ഡ് സ്വപ്നം കണ്ടുവെന്നാണ് ആന്‍ഡ്രേ റസ്സൽ വ്യക്തമാക്കിയത്. അത് എങ്ങനെ സംഭവിച്ചുവെന്ന് തനിക്ക് അറിയില്ലെന്നും താരം സൂചിപ്പിച്ചു.
ബാറ്റിംഗിലും ബൗളിംഗിലും ഒരു പോലെ തിളങ്ങിയാണ് റസ്സൽ തന്റെ മടങ്ങി വരവ് ഉജ്ജ്വലമാക്കിയത്. വിക്കറ്റ് ടു-പേസ്ഡ് ആയിരുന്നുവെന്നും ഒട്ടേറെ കട്ടറുകള്‍ എറിഞ്ഞാണ് വെസ്റ്റിന്‍ഡീസ് അവസാന ഘട്ടത്തിൽ മത്സരത്തിലേക്ക് തിരികെ വന്നതെന്നും പേസ് ഉണ്ടായപ്പോള്‍ ഇംഗ്ലണ്ട് സ്കോര്‍ ചെയ്യുകയായിരുന്നുവെന്നും റസ്സൽ അഭിപ്രായപ്പെട്ടു.
വിന്‍ഡീസ് ബാറ്റിംഗിന് ഡെപ്തുണ്ടെന്നും അതിനാൽ തന്നെ അവസാനം വരെ ബാറ്റ് വീശിയാൽ ടീം ജയിക്കുമെന്ന് ഉറപ്പായിരുന്നുവെന്നും റസ്സൽ സൂചിപ്പിച്ചു.
