2018ൽ ദക്ഷിണാഫ്രിക്കക്കെതിരായ ടെസ്റ്റ് മത്സരത്തിനിടെ പന്ത് ചുരണ്ടിയതുമായി ബന്ധപ്പെട്ട വിവാദത്തിൽ മുഴുവൻ ഓസ്‌ട്രേലിയൻ താരങ്ങളും ഉൾപ്പെട്ടിട്ടുണ്ടെന്ന് മുൻ ഇംഗ്ലണ്ട് താരം ഫ്ലിന്റോഫ്. അതെ സമയം ഇതിന്റെ ഉത്തരവാദിത്തം സ്റ്റീവ് സ്മിത്ത് ഏറ്റെടുക്കുകയായിരുന്നുവെന്നും ഫ്ലിന്റോഫ് പറഞ്ഞു.
മുഴുവൻ ടീമും ഉൾപ്പെടാതെ പന്ത് ചുരണ്ടൽ നടക്കുമെന്ന് തനിക്ക് തോന്നുന്നില്ലെന്നും ഒരു ബൗളർ എന്ന നിലയിൽ ആരെങ്കിലും ഒരു ചുരണ്ടിയ പന്ത് നൽകിയാൽ അത് വളരെ അനായാസം തിരിച്ചറിയാൻ പറ്റുമെന്നും എന്നാൽ എല്ലാവർക്കും വേണ്ടി സ്റ്റീവ് സ്മിത്ത് കുറ്റം ഏറ്റെടുക്കുകയായിരുന്നുവെന്നും ഫ്ലിന്റോഫ് പറഞ്ഞു.
ക്രിക്കറ്റ് ലോകത്തെ പിടിച്ചുലച്ച പന്ത് ചുരണ്ടൽ വിവാദത്തെ തുടർന്ന് ഓസ്‌ട്രേലിയൻ താരങ്ങളായ സ്റ്റീവ് സ്മിത്ത്, ഡേവിഡ് വാർണർ, കാമറൂൺ ബാൻക്രോഫ്റ്റ് എന്നിവർക്ക് ഐ.സി.സി വിലക്കേർപ്പെടുത്തുകയും ചെയ്തിരുന്നു. സ്റ്റീവ് സ്മിത്തിന് അന്ന് ഒരു വർഷത്തേക്കാണ് ക്രിക്കറ്റിൽ നിന്ന് വിലക്കേർപ്പെടുത്തിയത്.
