ദുബായ് ടെസ്റ്റില്‍ ഓസ്ട്രേലിയയെ നാലാം ദിവസം അവസാന സെഷനില്‍ തിരിച്ചടിച്ച് പാക്കിസ്ഥാന്‍. മുഹമ്മദ് അബ്ബാസിന്റെ മൂന്ന് വിക്കറ്റ് നേട്ടത്തിലൂടെയാണ് ഓസ്ട്രേലിയയെ പാക്കിസ്ഥാന്‍ പ്രതിരോധത്തിലാക്കിയത്. ആരോണ്‍ ഫിഞ്ചും ഉസ്മാന്‍ ഖ്വാജയും ചേര്‍ന്ന് ഒന്നാം വിക്കറ്റില്‍ 87 റണ്‍സ് ചേര്‍ത്ത ശേഷമാണ് ടീമിന്റെ തകര്‍ച്ച.
തന്റെ രണ്ടാം അര്‍ദ്ധ ശതകത്തിനരികെയാണ് ഫിഞ്ച്(49) പുറത്തായത്. അതേ ഓവറിന്റെ അവസാന പന്തില്‍ മുഹമ്മദ് അബ്ബാസ് ഷോണ്‍ മാര്‍ഷിനെയും അടുത്ത ഓവറിലെ സഹോദരന്‍ മിച്ചല്‍ മാര്‍ഷിനെയും പുറത്താക്കിയതോടെ ഓസ്ട്രേലിയയുടെ നില പരുങ്ങലിലായി. 87/0 എന്ന നിലയില്‍ നിന്ന് 87/3 എന്ന നിലയിലേക്ക് വീണ ശേഷം ഓസ്ട്രേലിയ ദിവസം കൂടുതല്‍ വിക്കറ്റ് നഷ്ടമില്ലാതെ അവസാനിക്കുകയായിരുന്നു.
നാലാം ദിവസം അവസാനിക്കുമ്പോള്‍ ഓസ്ട്രേലിയ 136/3 എന്ന നിലയിലാണ്. 7 വിക്കറ്റുകള്‍ കൈവശമുള്ള ടീമിനു അവസാന ദിവസം വിജയത്തിനായി 326 റണ്‍സ് കൂടി നേടേണ്ടതുണ്ട്. 50 റണ്‍സുമായി ഉസ്മാന്‍ ഖ്വാജയ്ക്കൊപ്പം 34 റണ്‍സ് നേടിയ ട്രാവിസ് ഹെഡ് ആണ് ക്രീസില്‍ നില്‍ക്കുന്നത്.
