ഓസ്ട്രേലിയൻ ഓപ്പൺ: നിലവിലെ ചാമ്പ്യൻ മാഡിസൺ കീസിനെ പുറത്താക്കി ജെസീക്ക പെഗുല ക്വാർട്ടറിൽ
ഓസ്ട്രേലിയൻ ഓപ്പൺ ടെന്നീസിൽ നിലവിലെ ചാമ്പ്യനും തന്റെ അടുത്ത സുഹൃത്തുമായ മാഡിസൺ കീസിനെ പരാജയപ്പെടുത്തി ആറാം സീഡ് ജെസീക്ക പെഗുല ക്വാർട്ടർ ഫൈനലിൽ പ്രവേശിച്ചു. റോഡ് ലാവർ അരീനയിൽ നടന്ന ആവേശകരമായ മത്സരത്തിൽ നേരിട്ടുള്ള സെറ്റുകൾക്കായിരുന്നു പെഗുലയുടെ വിജയം. സ്കോർ: 6-3, 6-4.
കരിയറിൽ നാലാം തവണയാണ് പെഗുല ഓസ്ട്രേലിയൻ ഓപ്പണിന്റെ ക്വാർട്ടറിൽ എത്തുന്നത്. ഈ ടൂർണമെന്റിലുടനീളം മികച്ച ഫോമിലുള്ള താരം കളിച്ച നാല് മത്സരങ്ങളിൽ നിന്നായി വെറും 17 ഗെയിമുകൾ മാത്രമാണ് ഇതുവരെ വഴങ്ങിയത് എന്നത് ശ്രദ്ധേയമാണ്.
അമേരിക്കൻ താരങ്ങൾ തമ്മിലുള്ള ഈ പോരാട്ടത്തിൽ മാഡിസൺ കീസിന് പറ്റിയ പിഴവുകൾ പെഗുലയ്ക്ക് കാര്യങ്ങൾ എളുപ്പമാക്കി. മത്സരത്തിൽ കീസ് 27 അൺഫോഴ്സ്ഡ് എററുകളും ആറ് ഡബിൾ ഫോൾട്ടുകളും വരുത്തി. എന്നാൽ മികച്ച സെർവുകളിലൂടെയും കൃത്യമായ തന്ത്രങ്ങളിലൂടെയും പെഗുല കളി നിയന്ത്രിച്ചു. രണ്ടാമത്തെ സെറ്റിൽ മാഡിസൺ കീസ് തിരിച്ചുവരവിന് ശ്രമിച്ചെങ്കിലും നിർണ്ണായക പോയിന്റുകൾ സ്വന്തമാക്കി പെഗുല വിജയം ഉറപ്പിക്കുകയായിരുന്നു.
2024 യുഎസ് ഓപ്പൺ ഫൈനലിൽ എത്തിയ പെഗുല തന്റെ കന്നി ഗ്രാൻഡ്സ്ലാം കിരീടമാണ് ഇത്തവണ ലക്ഷ്യമിടുന്നത്.