18ആം സ്വർണ്ണം, 4*400 റിലേയിലും ഇന്ത്യൻ കരുത്ത്

ഇന്ത്യക്ക് അത്ലറ്റിക്സിൽ ഒരു സ്വർണ്ണം കൂടെ. 4*400 റിലേയിൽ ഇന്ത്യൻ പുരുഷ സംഘം സ്വർണ്ണം നേടി. ബുഡാപെസ്റ്റിൽ ഏഷ്യൻ റെക്കോർഡ് തകർത്ത ഇന്ത്യൻ ടീം ഇന്നും പൂർണ്ണ ആധിപത്യത്തോടെയാണ് ഓടിയത്. മുഹമ്മദ് അനസ് യഹിയ, അമോജ് ജേക്കബ്, മുഹമ്മദ് അജ്മൽ, രാജേഷ് രമേശ് എന്നിവരാണ് ഇന്ത്യക്ക് ഈ അഭിമാന സ്വർണ്ണം നൽകിയത്.

ആദ്യ ലാപ് മുതൽ ഇന്ത്യ ലീഡ് എടുത്തു. മുഹമ്മദ് അനസ് യഹിയ ആണ് ഇന്ത്യക്ക് ആയി ആദ്യം ഓടിയത്‌. ബാറ്റൺ ഏറ്റുവാങ്ങിയ അമോജ് ജേക്കബ് ആ ലീഡ് വർധിപ്പിച്ചു. മുഹമ്മദ് അജ്മൽ ശക്തമായ പോരാട്ടം നേരിട്ടു എങ്കിലും ആ ലീഡ് കുറയാതെ അവസാനം രാജേഷിനെ ബാറ്റൺ ഏല്പിച്ചു. രാജേഷിന്റെ കയ്യിൽ എത്തിയതോടെ ഇനി ആരും ഇന്ത്യയെ മറികടക്കില്ല എന്ന് ഉറപ്പായിരുന്നു. സമ്മർദ്ദം ഒന്നും ക്ഷണിക്കാതെ വ്യക്തമായ ലീഡോടെ ഇന്ത്യ ഒന്നാമത് ഫിനിഷ് ചെയ്തു. ഇന്ത്യയുടെ 18ആം സ്വർണ്ണമാണിത്. ഇന്ത്യയുടെ ആകെ മെഡൽ 81ഉം ആയി.