യു.എസ് ഓപ്പണിൽ ഒമ്പതാം സീഡ് ഡീഗോ ഷ്വാർട്ട്സ്മാൻ ആദ്യ റൗണ്ടിൽ പുറത്ത്, ഷപോവലോവിനു ജയം

യു.എസ് ഓപ്പണിൽ ആദ്യ റൗണ്ടിൽ തന്നെ പുറത്തായി അർജന്റീനൻ താരവും ഒമ്പതാം സീഡുമായ ഡീഗോ ഷ്വാർട്ട്സ്മാൻ. സീഡ് ചെയ്യാത്ത ബ്രിട്ടീഷ് താരമായ കാമറൂൺ നോറി ആണ് ഷ്വാർട്ട്സ്മാനെ അട്ടിമറിച്ചത്. ആദ്യ 2 സെറ്റുകൾ ജയിച്ച ശേഷം ആയിരുന്നു 5 സെറ്റ് നീണ്ട മാർത്തോൻ പോരാട്ടത്തിൽ അർജന്റീനൻ താരത്തിന്റെ പരാജയം. ആദ്യ സെറ്റ് 6-3 നും രണ്ടാം സെറ്റ് 6-4 നും സ്വന്തമാക്കിയ ഷ്വാർട്ട്സ്മാനു പക്ഷെ മൂന്നാം സെറ്റ് മുതൽ ആ മുൻതൂക്കം നിലനിർത്താൻ ആയില്ല. മൂന്നാം സെറ്റ് 6-2 നു സ്വന്തമാക്കിയ ബ്രിട്ടീഷ് താരം മത്സരത്തിൽ തിരിച്ചു വന്നു.

നാലാം സെറ്റിൽ 6-1 നു ഗംഭീര പ്രകടനം നടത്തിയ ബ്രിട്ടീഷ് താരം മത്സരം അഞ്ചാം സെറ്റിലേക്ക് നീട്ടി. അഞ്ചാം സെറ്റിൽ പൊരുതി നോക്കിയെങ്കിലും അവസാന ബ്രൈക്ക് കണ്ടത്തിയ ബ്രിട്ടീഷ് താരം ഷ്വാർട്ട്സ്മാനെ 7-5 നു മറികടന്നു രണ്ടാം റൗണ്ടിലേക്ക് മുന്നേറി. അതേസമയം കനേഡിയൻ താരവും പന്ത്രണ്ടാം സീഡുമായ ഡെന്നിസ് ഷപോവലോവും രണ്ടാം റൗണ്ടിലേക്ക് മുന്നേറി. അമേരിക്കൻ താരമായ സീഡ് ചെയ്യാത്ത സെബ്യാസ്റ്റ്യൻ കോർദയെ 4 സെറ്റ് പോരാട്ടത്തിൽ ആണ് കനേഡിയൻ താരം മറികടന്നത്. ആദ്യ സെറ്റ് 6-4 നു നേടിയ താരം രണ്ടാം സെറ്റ് സമാനമായ സ്കോറിന് വഴങ്ങിയെങ്കിലും മൂന്നും നാലും സെറ്റുകളിൽ തിരിച്ചു വന്നു. മൂന്നാം സെറ്റ് 6-3 നും നാലാം സെറ്റ് 6-2 നും ജയിച്ച് ആയിരുന്നു ഷപോവലോവ് ആദ്യ റൗണ്ടിൽ ജയം കണ്ടത്.