റോജേഴ്‌സ് കപ്പിന്റെ ഫൈനലിൽ ലോക ഒന്നാം നമ്പർ താരം റാഫേൽ നദാൽ ഗ്രീസിന്റെ സെൻസേഷൻ സ്റ്റെഫാനോസിനെ നേരിടും. അട്ടിമറികൾ ശീലമാക്കിയ ഗ്രീസ് താരം ഇന്നലെ വീഴ്ത്തിയത് സൗത്താഫ്രിക്കയുടെ കെവിൻ ആന്ഡേഴ്സനെയാണ്. അതും കഴിഞ്ഞ മത്സരത്തിലേത് പോലെ മാച്ച് പോയിന്റ് അതിജീവിച്ച്. മത്സരം 3 സെറ്റുകൾ നീണ്ടു നിന്നു.
ആദ്യ സെറ്റ് ആൻഡേഴ്‌സൻ നേടിയെങ്കിലും രണ്ടിലും മൂന്നിലും ശക്തമായി തിരിച്ചുവന്ന സ്റ്റെഫാനോസ് അവസാന സെറ്റിലെ ടൈബ്രേക്കറിൽ മാച്ച് പോയിന്റ് അതിജീവിച്ച് ഒരു അട്ടിമറി കൂടെ തന്റെ പേരിലെഴുതുകയും ഒപ്പം ആദ്യ മാസ്റ്റേഴ്സ് ഫൈനലിൽ ഇടം സമ്പാദിക്കുകയും ചെയ്തു. റാഫേൽ നദാൽ കാച്ചനോവിന്റെ ശക്തമായ വെല്ലുവിളി അതിജീവിച്ചാണ് ഫൈനലിൽ കടന്നത്. ആദ്യ സെറ്റ് ടൈബ്രേക്കർ വരെ നീണ്ടെങ്കിലും രണ്ടാം സെറ്റിൽ ബ്രേക്ക് മുതലാക്കിയ നദാൽ 6-4 എന്ന സ്കോറിന് സെറ്റും മത്സരവും സ്വന്തമാക്കി.
വനിതകളിൽ ഒന്നാം നമ്പർ താരം സിമോണ ഹാലെപ് മൂന്നാം സീഡ് അമേരിക്കയുടെ സ്റ്റീഫൻസിനെ നേരിടും. സിമോണ 15-സീഡ് ബാർട്ടിയെ അനായാസം തോൽപ്പിച്ചാണ് ഫൈനലിലേക്ക് യോഗ്യത നേടിയത്. മറുവശത്ത് അഞ്ചാം സീഡ് സ്വിറ്റോലിനയെ നേരിട്ടുള്ള സെറ്റുകളിൽ മറികടന്നാണ് സ്റ്റീഫൻസ് ഫൈനലിൽ കടന്നത്.
കൂടുതൽ കായിക വാർത്തകൾക്ക് : www.facebook.com/FanportOfficial
