പൊരുതി നോക്കിയെങ്കിലും തോല്‍വി ഒഴിവാക്കാനാകാതെ പട്ന, അവസാന നിമിഷം വിജയം പിടിച്ചെടുത്ത് ബെംഗളൂരു

- Advertisement -

തുടര്‍ച്ചയായ നാലാം മത്സരത്തിലും പട്ന പൈറേറ്റ്സിനു തോല്‍വി. ബെംഗളൂരു ബുള്‍സിനോട് അവസാന നിമിഷം വരെ പൊരുതിയെങ്കിലും 43-41 എന്ന സ്കോറിനു ബുള്‍സ് പട്നയെ മറികടന്ന് വിജയം ഉറപ്പാക്കി. പര്‍ദീപ് നര്‍വാല്‍ വീണ്ടും നിറം മങ്ങിയ മത്സരത്തില്‍ ദീപക് നര്‍വാലും മഞ്ജീത്തും 10 പോയിന്റ് വീതം നേടിയാണ് പട്നയെ മുന്നോട്ട് നയിച്ചത്. എന്നാല്‍ പവന്‍ ഷെഹ്റാവത്തിന്റെയും കാശിലിംഗ് അഡ്കേയുടെയും മികവില്‍ ബെംഗളൂരു വിജയം ഉറപ്പാക്കുകയായിരുന്നു. അവസാന മിനുട്ട് വരെ 41-41നു ഇരു ടീമുകളും തുല്യത പാലിച്ചപ്പോള്‍ അവസാന രണ്ട് റെയിഡുകളില്‍ മത്സരം ബെംഗളൂരു പിടിച്ചെടുക്കുകയായിരുന്നു. ആദ്യ പകുതി അവസാനിക്കുമ്പോള്‍ 21-18നു പട്നയ്ക്കായിരുന്നു ലീഡ്.

ഷെഹ്റാവത്ത് 15 പോയിന്റും കാശിലിംഗ് 11 പോയിന്റുമാണ് നേടിയത്. രോഹിത് കുമാര്‍ ഏഴ് പോയിന്റ് നേടി. 29-22നു ബെംഗളൂരു റെയിഡിംഗില്‍ മികവ് പുലര്‍ത്തിയപ്പോള്‍ പ്രതിരോധത്തില്‍ 13-10നു പട്നയായിയിരുന്നു മുന്നില്‍. രണ്ട് തവണ ബെംഗളൂരുവിനെ ഓള്‍ഔട്ട് ആക്കുവാന്‍ പട്നയ്ക്ക് സാധിച്ചപ്പോള്‍ ബെംഗളൂരു ഒരു തവണ പട്നയെ പുറത്താക്കി.

Advertisement