ഇന്ത്യൻ ഓപ്പൺ ഫൈനലിൽ ഇന്ത്യൻ ഡബിൾസ് സഖ്യം സാത്വിക്-ചിരാഗ് പരാജയപ്പെട്ടു. നിലവിലെ ലോക ചാമ്പ്യൻമാരായ കാങ് മിൻ-ഹ്യൂക്കും സിയോ സിയൂങ്-ജെയും ആണ് സാത്വിക്‌സായിരാജ് റാങ്കിരെഡിയുടെയും ചിരാഗ് ഷെട്ടിയുടെയും കിരീട സ്വപ്നം തകർത്തത്‌. ന്യൂഡൽഹിയിലെ ഇന്ദിരാഗാന്ധി സ്റ്റേഡിയത്തിൽ ഒരു മണിക്കൂറും 5 മിനിറ്റും നീണ്ടുനിന്ന മത്സരത്തിൽ ഒരു സെറ്റിന് മുന്നിട്ടു നിന്ന ശേഷമായിരുന്നു പരാജയം.
15-21, 21-11, 21-18 എന്ന സ്‌കോറിനാണ് കാംഗും സിയോയും ഇന്ത്യൻ താരങ്ങളെ തോൽപ്പിച്ചത്. ഈ വർഷം ഇത് രണ്ടാം തവണയാണ് സാത്വികും ചിരാഗും ഫൈനലിൽ പരാജയപ്പെടുന്നത്‌. പരാജയപ്പെട്ടു എങ്കിലും നാളെ വരുന്ന പുതിയ റാങ്കിംഗിൽ അവർ ഒന്നാമത് എത്തും.
