2023 ഹോക്കി ലോകകപ്പ് ഫൈനലില്‍ ബെൽജിയവും ജര്‍മ്മനിയും ഏറ്റുമുട്ടും. ഇന്ന് നടന്ന സെമി ഫൈനൽ മത്സരങ്ങളിൽ ജര്‍മ്മനി ഓസ്ട്രേലിയയെയും ബെൽജിയം നെതര്‍ലാണ്ട്സിനെയും ആണ് പരാജയപ്പെടുത്തിയത്.
ഓസ്ട്രേലിയയ്ക്കെതിരെ 4-3ന്റെ വിജയം ജര്‍മ്മനി നേടിയ്പ്പോള്‍ ബെൽജിയം നെതര്‍ലാണ്ട്സ് മത്സരം നിശ്ചിത സമയത്ത് 2-2 എന്ന സ്കോറിൽ അവസാനിച്ചു. പിന്നീട് ഷൂട്ടൗട്ടിൽ 3-2 ന്റെ വിജയം ബെൽജിയം കരസ്ഥമാക്കുകയായിരുന്നു.
ജര്‍മ്മനിയ്ക്കെതിരെ ഓസ്ട്രേലിയ 57ാം മിനുട്ടിൽ മത്സരത്തിൽ 3-2ന്റെ ലീഡ് നേടിയെങ്കിലും 58, 59 മിനുട്ടുകളിൽ ഗോളുകള്‍ മടക്കിയാണ് ജര്‍മ്മനി മത്സരം സ്വന്തമാക്കിയത്. ഗോൺസാലോ പെയ്ലാട്ട് ഹാട്രിക്ക് ഗോളുകള്‍ നേടിയപ്പോള്‍ നിക്ലാസ് വെല്ലന്‍ ആണ് വിജയ ഗോള്‍ നേടിയത്.
ഓസ്ട്രേലിയയ്ക്കായി ജെറമി ഹേവാര്‍ഡ്, നഥാന്‍ എഫാര്‍മസ്, ബ്ലേക്ക് ഗോവേഴ്സ്സ എന്നിവര്‍ ആണ് ഗോളുകള്‍ നേടിയത്.
ബെൽജിയം നെതര്‍ലാണ്ട്സ് മത്സരത്തിൽ 11ാം മിനുട്ടിൽ ജിപ് ജാന്‍സന്‍ നെതര്‍ലാണ്ട്സിന് ലീഡ് നേടിക്കൊടുത്തപ്പോള്‍ ടോം ബൂൺ 26ാം മിനുട്ടിൽ മത്സരം സമനിലയിലാക്കി. ജിപ് വീണ്ടും നെതര്‍ലാണ്ട്സിന് ലീഡ് നേടിക്കൊടുത്തുവെങ്കിലും 44ാം മിനുട്ടിൽ നികോളസ് ഡി കെര്‍പെൽ ബെൽജിയത്തിനായി വീണ്ടും സമനില പിടിച്ചു.
