റയൽ മാഡ്രിഡ് വിട്ട ഡിഫൻഡർ നാച്ചോ ഫെർണാണ്ടസ് ഇനി സൗദി അറേബ്യയിൽ കളിക്കാൻ സാധ്യത. താരം സൗദി ക്ലബായ അൽ ഇത്തിഹാദിന്റെ ഓഫർ സ്വീകരിക്കും എന്നാണ് റിപ്പോർട്ടുകൾ. ഇത്തിഹാദിൽ വെൻസീമയും നാചോയും ഒരുമിക്കുന്നത് ആരാധകർക്ക് കാണാൻ ആകും. താരം യൂറോപ്പിൽ തുടരാൻ ആഗ്രഹിക്കുന്നില്ല എന്ന് ഫബ്രിസിയോ റൊമാനോ റിപ്പോർട്ട് ചെയ്യുന്നു. യൂറോപ്പിൽ റയൽ അല്ലാതെ ഒരു ക്ലബിനായി കളിക്കില്ല എന്നാണ് താരത്തിന്റെ തീരുമാനം.
റയൽ മാഡ്രിഡ് ക്ലബിൽ കരാർ പുതുക്കില്ല എന്ന് നേരത്തെ അറിയിച്ചിരുന്നു. റയൽ മാഡ്രിഡ് താരത്തിന് പുതിയ കരാർ നൽകാൻ തയ്യാറായിരുന്നു നാച്ചോ ക്ലബ് മാനേജ്മെന്റിനോട് താൻ ക്ലബ് വിടാൻ ആഗ്രഹിക്കുന്നു എന്ന് അറിയിക്കുക ആയിരുന്നു. നാചോ അവസാന 23 വർഷമായി റയൽ മാഡ്രിഡിനൊപ്പം ഉണ്ടായിരുന്നു.
23 വർഷം മുമ്പ് റയൽ മാഡ്രിഡിന്റെ അക്കാദമിയിൽ ചേർന്ന നാച്ചോ 2011 ഏപ്രിലിൽ വലൻസിയയ്ക്കെതിരായ മത്സരത്തിൽ ആയിരുന്നു റയലിനായി സീനിയർ അരങ്ങേറ്റം നടത്തിയത്. നാച്ചോ റയൽ മാഡ്രിഡിനായി ഇതുവരെ 400ൽ അധികം കളികൾ കളിച്ചിട്ടുണ്ട്. റയലിനൊപ്പം ആറ് ചാമ്പ്യൻസ് ലീഗ് അടക്കം 25 ട്രോഫികളും താരം നേടി. 33-കാരൻ ചാമ്പ്യൻസ് ലീഗിൽ മാത്രം ഇതുവരെ റയലിനായി 60ൽ അധികം മത്സരങ്ങൾ കളിച്ചിട്ടുണ്ട്.
