ഇന്റർ മയാമിക്കും മെസ്സിക്കും അമേരിക്കൻ ലീഗിൽ തകർപ്പൻ വിജയം. ഒർലാണ്ടോ സിറ്റിയെ നേരിട്ട ഇന്റർ മയാമി എതിരില്ലാത്ത അഞ്ചു ഗോളുകൾക്ക് ആണ് വിജയിച്ചത്. ലൂയിസ് സുവാരസും മെസ്സിയും ഇരട്ട ഗോളുകളുമായി മത്സരത്തിൽ തിളങ്ങി. നാലാം മിനുട്ടിൽ തന്നെ ഇന്റർ മയാമി ഗോളടി തുടങ്ങി. ഗ്രെസലിന്റെ അസിസ്റ്റിൽ നിന്ന് സുവാരസ് ആണ് ആദ്യ ഗോൾ നേടിയത്.
പതിനൊന്നാം മിനുട്ടിൽ ഇതേ കൂട്ടുകെട്ടിലൂടെ തന്നെ രണ്ടാം ഗോളും വന്നു. 29ആം മിനുട്ടിൽ സുവാരസിന്റെ അസിസ്റ്റിൽ നിന്ന് ടെയ്ലർ ഇന്റർ മയാമിയുടെ ലീഡ് മൂന്നാക്കൊ ഉയർത്തി. 44ആം മിനുട്ടിൽ മൂന്നാം ഗോൾ നേടി സുവാരസ് ഹാട്രിക്ക് പൂർത്തിയാക്കി എങ്കിലും ആ ഗോൾ നിഷേധിക്കപ്പെട്ടു.
രണ്ടാം പകുതിയിൽ 57ആം മിനുട്ടിൽ മെസ്സി മാജിക്കിലൂടെ നാലാം ഗോൾ വന്നു. അതിനു ശേഷം സുവാരസിന്റെ അസിസ്റ്റിൽ മെസ്സിയുടെ രണ്ടാം ഗോളും വന്നു. ഇത് ഇന്റർ മയാമിയുടെ വിജയം പൂർത്തിയാക്കി. ഈ ജയത്തോടെ 3 മത്സരങ്ങളിൽ നിന്ന് 7 പോയിന്റുമായി ഇന്റർ മയാമി ലീഗിൽ ഒന്നാം സ്ഥാനത്ത് നിൽക്കുകയാണ്.
