സീസണിൽ ഇരുപത് ലീഗ് ഗോളുകൾ തികച്ച് വിക്ടർ ഒസിമൻ ഒരിക്കൽ കൂടി തിളങ്ങിയപ്പോൾ ടോറിനോക്കെതിരെ ഗംഭീര ജയം കുറിച്ച് നാപോളി. ഓസിമൻ ഇരട്ട ഗോളുകൾ നേടിയപ്പോൾ ക്വിച ഖ്വരത്സ്കെലിയ, എൻഡോമ്പലെ എന്നിവർ മറ്റു ഗോളുകൾ കണ്ടെത്തി. ടോറിനോ പതിനൊന്നാം സ്ഥാനത്താണ്.
തുടർ ക്ലീൻ ഷിറ്റുകളുമായി എത്തിയ ടോറിനോക്ക് സ്വന്തം തട്ടകത്തിൽ തുടക്കം മുതൽ പിഴച്ചു. സെലിൻസ്കിയുടെ കോർണറിൽ ഹെഡർ ഉതിർത്ത് ഒസിമൻ തന്നെ അക്കൗണ്ട് തുറന്നു. 35 ആം മിനിറ്റിൽ ലഭിച്ച പെനാൽറ്റി വലയിൽ എത്തിച്ച് ഖ്വരത്സ്കെലിയ ലീഡ് ഇരട്ടി ആക്കി. പിന്നീട് സെലിൻസ്കിയുടെ ഷോട്ട് പോസ്റ്റിനെ തൊട്ടിരുമി കടന്ന് പോയി.
രണ്ടാം പകുതിയിൽ നാപോളി ഗോളടി തുടർന്നു. ഇടത് വിങ്ങിൽ ഖ്വരത്സ്കെലിയ സമർദ്ധമായി കൈമാറിയ പന്ത് മത്തിയസ് ഒലീവേര ബോക്സിലേക്ക് ഉയർത്തി നൽകിയപ്പോൾ ഒസിമൻ തന്റെ രണ്ടാം ഗോളും ഹെഡറിലൂടെ കണ്ടെത്തി. 68ആം മിനിറ്റിൽ പകരക്കാരനായി എത്തിയ എൻഡോമ്പലെ നാലാം ഗോൾ നേടി. ടോറിനോ പ്രതിരോധത്തിൽ സമ്മർദം ചെലുത്തി ഒസിമൻ നേടിയെടുത്ത ബോൾ ഖ്വരത്സ്കെലിയ ബോക്സിലേക്ക് ഓടിക്കയറിയ താരത്തിന് കൈമാറുകയായിരുന്നു. പിന്നീട് ടോറിനോക്ക് വേണ്ടി ബോക്സിനുള്ളിൽ നിന്നും സനാബ്രിയയുടെ ശ്രമം ഗോളിൽ നിന്നും അകന്ന് പോയി.
