ടോട്ടൻഹാം സൂപ്പർ താരം ഹാരി കെയ്‌നിനെ ടീമിൽ നിലനിർത്താൻ ടോട്ടൻഹാമിന്‌ ചാമ്പ്യൻസ് ലീഗ് യോഗ്യത ആവശ്യമില്ലെന്ന് പരിശീലകൻ റയാൻ മേസൺ. ടോട്ടൻഹാം ചാമ്പ്യൻസ് ലീഗ് യോഗ്യത നേടിയില്ലെങ്കിലും താരം ടീം വിട്ടേക്കും എന്ന വർത്തകൾക്കിടയിലാണ് ടോട്ടൻഹാം പരിശീലകന്റെ പ്രതികരണം. നേരത്തെ മോശം പ്രകടനത്തെ തുടർന്ന് ടോട്ടൻഹാം പരിശീലകനായ മൗറിനോയെ പുറത്താക്കിയിരുന്നു. തുടർന്നാണ് റയാൻ മേസൺ ടോട്ടൻഹാം പരിശീലക സ്ഥാനം ഏറ്റെടുത്തത്.
നിലവിൽ 27കാരനായ ഹാരി കെയ്‌നിന്റെ ടോട്ടൻഹാമിൽ കരാർ 2024വരെയാണ് ഉള്ളത്. എന്നാൽ കഴിഞ്ഞ ദിവസം കാരബാവോ കപ്പ് ഫൈനലിൽ മാഞ്ചസ്റ്റർ സിറ്റിയോട് തോറ്റതിന് പിന്നാലെ തനിക്ക് ട്രോഫികൾ വേണമെന്ന സൂചനയും താരം നൽകിയിരുന്നു. നിലവിൽ ടോട്ടൻഹാമിന്റെ കൂടെ ഒരു വലിയ കിരീടം പോലും നേടാൻ ഹാരി കെയ്നിന് ആയിട്ടില്ല. നിലവിൽ പ്രീമിയർ ലീഗ് പോയിന്റ് പട്ടികയിൽ ഏഴാം സ്ഥാനത്താണ് ടോട്ടൻഹാം.നാലാം സ്ഥാനത്തുള്ള ചെൽസിയെക്കാൾ 5 പോയിന്റ് പിറകിലാണ് ടോട്ടൻഹാം ഇപ്പോൾ. നിലവിലെ സാഹചര്യത്തിൽ ടോട്ടൻഹാം ചാമ്പ്യൻസ് ലീഗ് യോഗ്യത നേടാനുള്ള സാധ്യത വളരെ കുറവാണ്.
