ലയണൽ മെസ്സിക്ക് പി എസ് ജിയിലും ഫ്രാൻസിലും അർഹിച്ച ബഹുമാനം കിട്ടിയില്ല എന്ന് എംബപ്പെ. ലയണൽ മെസ്സി ക്ലബ് വിടുകയാണെന്ന് അറിഞ്ഞപ്പോൾ പി എസ് ജിയിലെ പലരും ആശ്വസിക്കുകയായിരുന്നു എന്നും അത് തനിക്ക് എന്തുകൊണ്ടാണെന്ന് മനസ്സിലാകുന്നില്ല എന്നും എംബപ്പെ പറഞ്ഞു. പി എസ് ജി മാനേജ്മെന്റുമായി ഉടക്കിയ എംബപ്പെ ഗസറ്റെക്ക് നൽകിയ അഭിമുഖത്തിലാണ് ക്ലബിനെ രൂക്ഷമായി വിമർശിച്ചത്.
“മെസ്സി ഫുട്ബോൾ ചരിത്രത്തിലെ ഏറ്റവും മികച്ച കളിക്കാരിൽ ഒരാളാണ്. മെസ്സിയെപ്പോലൊരാൾ ക്ലബ് വിട്ട് പോയാൽ അതൊരു നല്ല വാർത്തയല്ല.” എംബപ്പെ പറയുന്നു.
“അദ്ദേഹം പോയതിൽ ഇത്രയധികം ആളുകൾ പി എസ് ജിയിൽ ആശ്വസിച്ചത് എന്തുകൊണ്ടാണെന്ന് എനിക്ക് കൃത്യമായി മനസ്സിലാകുന്നില്ല. ഫ്രാൻസിൽ അദ്ദേഹത്തിന് അർഹമായ ബഹുമാനം ലഭിച്ചില്ല, ” എംബപ്പെ പറഞ്ഞു. എംബപ്പെ ഈ ട്രാൻസ്ഫർ വിൻഡോയോടെ പി എസ് ജി വിടും എന്നാണ് ഇപ്പോൾ പ്രതീക്ഷിക്കപ്പെടുന്നത്.
