എൻസോ ഫെർണാണ്ടസിനായി മാഞ്ചസ്റ്റർ സിറ്റി വലവിരിക്കുന്നു

മാഞ്ചസ്റ്റർ സിറ്റിയുടെ മധ്യനിരയിലെ കരുത്തനായ ബെർണാർഡോ സിൽവ ഈ സീസണൊടുവിൽ ക്ലബ്ബ് വിടുമെന്ന് ഉറപ്പായതോടെ പകരക്കാരനായി ചെൽസിയുടെ അർജന്റീന താരം എൻസോ ഫെർണാണ്ടസിനെ എത്തിക്കാൻ സിറ്റി നീക്കം തുടങ്ങുന്നു. ഏകദേശം ഒരു പതിറ്റാണ്ടോളം സിറ്റിയുടെ വിജയങ്ങളിൽ നിർണ്ണായക പങ്കുവഹിച്ച സിൽവ പടിയിറങ്ങുമ്പോൾ ഉണ്ടാകുന്ന ക്രിയേറ്റീവ് വിടവ് നികത്താൻ ലോകകപ്പ് ജേതാവായ എൻസോയ്ക്ക് സാധിക്കുമെന്നാണ് പരിശീലകൻ പെപ് ഗ്വാർഡിയോളയുടെ കണക്കുകൂട്ടൽ. ഈ സീസണിൽ ചെൽസിക്കായി 12 ഗോളുകളും ആറ് അസിസ്റ്റുകളും നേടി മികച്ച ഫോമിൽ കളിക്കുന്ന 25-കാരനായ എൻസോയെ ടീമിലെത്തിക്കാൻ വലിയൊരു തുക തന്നെ സിറ്റിക്ക് ചിലവാക്കേണ്ടി വരും.

റയൽ മാഡ്രിഡിനെക്കുറിച്ചുള്ള ചില പരാമർശങ്ങളുടെ പേരിൽ അടുത്തിടെ ചെൽസിയിൽ നിന്ന് സസ്‌പെൻഷൻ നേരിട്ട എൻസോയുടെ നീക്കങ്ങൾ കായിക ലോകം ഉറ്റുനോക്കുകയാണ്. നിലവിൽ പ്രീമിയർ ലീഗിൽ ആഴ്സണലിനൊപ്പം പോയിന്റ് പട്ടികയിൽ ഒപ്പത്തിനൊപ്പം നിൽക്കുന്ന സിറ്റി, ടീമിനെ കൂടുതൽ കരുത്തുറ്റതാക്കാൻ എൻസോയുടെ എനർജിയും വിഷനും സഹായിക്കുമെന്ന് വിശ്വസിക്കുന്നു. എൻസോയെ കൂടാതെ നോട്ടിംഗ്ഹാം ഫോറസ്റ്റിന്റെ എലിയറ്റ് ആൻഡേഴ്സണെയും സിറ്റി ലക്ഷ്യം വെക്കുന്നുണ്ടെങ്കിലും എൻസോ ഫെർണാണ്ടസിനാണ് ഗ്വാർഡിയോള മുൻഗണന നൽകുന്നത്.

107 മില്യൺ പൗണ്ടിന് ടീമിലെത്തിച്ച താരത്തെ അത്ര പെട്ടെന്ന് വിട്ടുനൽകാൻ ചെൽസി തയ്യാറായേക്കില്ല എന്നതും റയൽ മാഡ്രിഡ് കൂടി താരത്തിനായി രംഗത്തുള്ളതും ട്രാൻസ്ഫർ ചർച്ചകളെ ആവേശകരമാക്കുന്നുണ്ട്.