മെസ്സിയുടെ ചിറകിലേറി പി എസ് ജി, ലീഗിൽ ഒന്നാമത് തുടരുന്നു

ലയണൽ മെസ്സി ഈ സീസണിൽ തന്റെ പഴയ ഫോമിലേക്ക് ഉയരുന്നതാണ് കാണാൻ കഴിയുന്നത്. അവസരങ്ങൾ സൃഷ്ടിക്കുകയും ഗോളടിക്കുകയും തുടരുന്ന മെസ്സി ഇന്ന് പി എസ് ജിയുടെ രക്ഷകനായി. ലീഗിൽ ഇന്ന് ലിയോണിനെ നേരിട്ട പി എസ് ജി എതിരില്ലാത്ത ഒരു ഗോളിനാണ് വിജയിച്ചത്. ഈ ഗോൾ വന്നത് മെസ്സിയുടെ ബൂട്ടിൽ നിന്ന് ആയിരുന്നു.

മെസ്സി

ലിയോണിന്റെ ഹോം ഗ്രൗണ്ടിൽ നടന്ന മത്സരത്തിൽ അഞ്ചാം മിനുട്ടിൽ തന്നെ പി എസ് ജിയെ മുന്നിൽ എത്തിക്കാൻ ലയണൽ മെസ്സിക്ക് ആയി. നെയ്മറും ഒത്തുള്ള ഒരു നീക്കമായിരുന്നു ഗോളായി മാറിയത്. മെസ്സിയുടെ ഈ സീസണിലെ നാലാം ലീഗ് ഗോളാണ് ഇത്. നെയ്മറിന്റെ സീസണിലെ ഏഴാം അസിസ്റ്റും. ഈ ഗോളിന് മറുപടി നൽകാൻ ലിയോണിന് ആയില്ല.

പി എസ് ജി ഈ വിജയത്തോടെ 8 മത്സരങ്ങളിൽ 22 പോയിന്റുമായി ലീഗിൽ ഒന്നാമത് നിൽക്കുകയാണ്. ലിയോൺ 13 പോയിന്റുമായി ആറാം സ്ഥാനത്തും നിൽക്കുന്നു.