സാഫ് കപ്പ് 2023 ചാമ്പ്യൻഷിപ്പിലെ ആദ്യ മത്സരത്തിൽ പാകിസ്താനെതിരെ ഇന്ത്യക്ക് മികച്ച വിജയം. ക്യാപ്റ്റൻ സുനിൽ ഛേത്രി ഹാട്രിക്ക് നേടിയ മത്സരത്തിൽ എതിരില്ലാത്ത നാലു ഗോളുകളുടെ വിജയമാണ് ഇന്ത്യ നേടിയത്. ഇനിയും ഏറെ ഗോളുകൾ നേടാൻ ആവാത്തതിൽ മാത്രമെ ഇന്ത്യക്ക് നിരാശ ഉണ്ടാകൂ. അത്രയധികം അവസരങ്ങൾ ഇന്ത്യ ഇന്ന് സൃഷ്ടിച്ചിരുന്നു.
ഇന്ത്യ ആദ്യ പകുതിയിൽ തന്നെ ബഹുദൂരം മുന്നിലായിരുന്നു. ഇന്ന് ആദ്യ 16 മിനുട്ടുകൾക്ക് അകം തന്നെ ഇന്ത്യ രണ്ടു ഗോളുകൾക്ക് മുന്നിൽ എത്തി. മത്സരത്തിന്റെ 10ആം മിനുട്ടിൽ പാകിസ്താൻ ഗോൾ കീപ്പർ സാഖിബ് ഹനീഫ് വരുത്തിയ പിഴവ് മുതലെടുത്ത് സുനിൽ ഛേത്രി തന്റെ ടീമിന് ലീഡ് നൽകി. ഇന്ന് രാവിലെ മാത്രം ബെംഗളൂരുവിൽ എത്തിയ പാകിസ്താന് കൃത്യമായി പരിശീലനം പോലും നടത്താൻ ആയിരുന്നില്ല. ഇതിന്റെ പ്രശ്നങ്ങൾ അവരുടെ പ്രകടനത്തിലും കാണാൻ കഴിഞ്ഞു.
മത്സരം 16ആം മിനുട്ടിൽ എത്തിയപ്പോൾ ഇന്ത്യക്ക് ലീഡ് ഉയർത്താനുള്ള രണ്ടാം അവസരം ലഭിച്ചു. ഒരു ഹാൻഡ്ബോളിന് ലഭിച്ച പെനാൾട്ടി ക്യാപ്റ്റൻ ഛേത്രി അനായാസം ലക്ഷ്യത്തിൽ എത്തിച്ചു. സ്കോർ 2-0. ഛേത്രിയുടെ 89ആം അന്താരാഷ്ട്ര ഗോളായി ഇത്. ഇതിനു ശേഷവും കളിയിൽ ഇന്ത്യൻ ആധിപത്യം ആണ് കാണാൻ ആയത്. അവസരങ്ങളും സൃഷ്ടിച്ചു. പക്ഷെ ആദ്യ പകുതിയിൽ കൂടുതൽ ഗോൾ നേടാൻ ഇന്ത്യക്ക് ആയില്ല.
ആദ്യ പകുതിയുടെ അവസാന നിമിഷങ്ങളിൽ കോച്ച് ഇഗോർ സ്റ്റിമാച് ചുവപ്പ് കാർഡ് കണ്ടത് ഇന്ത്യക്ക് ആദ്യ പകുതിയിലെ തിരിച്ചടിയായി. രണ്ടാം പകുതിയിലും ഇന്ത്യ ആക്രമണം തുടർന്നു. സഹലിനടക്കം പല ഇന്ത്യൻ താരങ്ങൾക്കും ഏറെ അവസരങ്ങൾ ലഭിച്ചു. അവസാനം 72ആം മിനുട്ടിൽ ഇന്ത്യക്ക് ഒരു പെനാൾട്ടി കൂടെ ലഭിച്ചു.
ഛേത്രി വിജയിച്ച പെനാൾട്ടി ഛേത്രി തന്നെ ലക്ഷ്യത്തിൽ എത്തിച്ചു. സ്കോർ 3-0. ഛേത്രിക്ക് ഹാട്രിക്ക്. ഇതോടെ താരം 90 അന്താരാഷ്ട്ര ഗോളുകളിലും എത്തി. ഇതിനു പിന്നാലെ 81ആം മിനുട്ടിൽ ഒരു ലോംഗ് ബോൾ മനോഹരമായി നിയന്ത്രിച്ച ശേഷം ഉദാന്ത ഇന്ത്യയുടെ നാലാം ഗോൾ നേടി.
ഈ വിജയത്തോടെ 3 പോയിന്റുമായി ഇന്ത്യ ഗ്രൂപ്പിൽ ഒന്നാമത് എത്തി. അടുത്ത മത്സരത്തിൽ ഇന്ത്യ നേപ്പാളിനെ ആകും നേരിടുക.
