ലെസ്റ്റർ സിറ്റി യുവതാരം വെസ്‌ലി ഫോഫനക്ക് ഗുരുതര പരിക്ക്. ഇന്നലെ വില്ലറയലിനെതിരെ നടന്ന സൗഹൃദ മത്സരതിനിടെയാണ് താരത്തിന് പരിക്കേറ്റത്. താരത്തിന്റെ കാൽമുട്ടിന് താഴെ പൊട്ടലേറ്റിട്ടുണ്ടെന്ന് താരം സോഷ്യൽ മീഡിയയിൽ പറഞ്ഞു. പ്രീമിയർ ലീഗ് തുടങ്ങാൻ ദിവസങ്ങൾ മാത്രം ബാക്കി നിൽക്കെ താരത്തിനേറ്റ പരിക്ക് ലെസ്റ്റർ സിറ്റിക്ക് വമ്പൻ തിരിച്ചടിയാണ്.
വില്ലറയൽ താരം നിനോയുടെ ടാക്കിളിൽ ആണ് ഫോഫനക്ക് പരിക്കേറ്റത്. പരിക്കേറ്റ താരത്തിന് ദീർഘ നേരം ഗ്രൗണ്ടിൽ ചികിത്സ നൽകിയതിന് ശേഷമാണ് ആശുപത്രിയിലേക്ക് മാറ്റിയത്. കഴിഞ്ഞ സീസണിൽ ലെസ്റ്റർ സിറ്റിക്ക് വേണ്ടി മികച്ച പ്രകടനം പുറത്തെടുത്ത താരമാണ് ഫോഫന. മത്സരത്തിൽ രണ്ടിനെതിരെ മൂന്ന് ഗോളുകൾക്ക് ലെസ്റ്റർ സിറ്റി ജയം സ്വന്തമാക്കിയിരുന്നു.
