ലോകകപ്പിന് ഇനി ദിവസങ്ങൾ മാത്രം ബാക്കിയിരിക്കെ അന്താരാഷ്ട്ര ടീമുകൾ അവരുടെ ലോകകപ്പ് സ്ക്വാഡുകൾ പ്രഖ്യാപിച്ചു തുടങ്ങുകയാണ്. ലോകകപ്പിലെ ഫേവറിറ്റ് ടീമുകളിൽ ഒന്നായ ബ്രസീൽ നാളെ ഖത്തർ ലോകകപ്പിനായുള്ള 26 അംഗ സ്ക്വാഡ് പ്രഖ്യാപിക്കും. കോച്ച് ടിറ്റെ നാളെ ബ്രസീൽ സമയം ഉച്ചക്ക് 1 മണിക്ക് ആകും സ്ക്വാഡ് പ്രഖ്യാപിക്കുക. ബ്രസീലിന്റെ സൂപ്പ താരനിരയിൽ ആരൊക്കെ ബ്രസീലിലേക്ക് വിമാനം കയറും എന്ന് നാളെ അറിയാൻ ആകും.
നെയ്മർ, വിനീഷ്യസ് ജൂനിയർ, കസമെറോ, ഫർമീനോ, റഫീഞ്ഞ, തിയാഗോ സിൽവ, മാർക്കിനോസ്, അലിസൺ, എഡേഴ്സൺ എന്ന് തുടങ്ങി പ്രമുഖ താരങ്ങൾ എല്ലാം ബ്രസീൽ ടീമിൽ ഉണ്ടാകും. ആഴ്സണൽ താരം മാർട്ടിനെല്ലി, മാഞ്ചസ്റ്റർ യുണൈറ്റഡ് താരം ആന്റണി, റയൽ മാഡ്രിഡിന്റെ റോഡ്രിഗോ തുടങ്ങിയ യുവതാരങ്ങളും ബ്രസീലിന്റെ അവസാന മാച്ച് സ്ക്വാഡിൽ എത്തും എന്ന് പ്രതീക്ഷിക്കപ്പെടുന്നു.
ഗ്രൂപ്പ് ജിയിൽ സെർബിയ, സ്വിറ്റ്സർലാന്റ്, കാമറൂൺ എന്നിവർക്ക് ഒപ്പം ആണ് ബ്രസീൽ ഉള്ളത്. നവംബർ 25ആം തീയതി സെർബിയക്ക് എതിരെ ആണ് ബ്രസീലിന്റെ ആദ്യ മത്സരം.
