Category: Champions League

യുഫേഫ ചാമ്പ്യൻസ് ലീഗ് പ്രീ ക്വാർട്ടർ ആദ്യ പാദത്തിൽ മികച്ച ജയം കുറിച്ചു ആസ്റ്റൺ വില്ല. ഗ്രൂപ്പ് ഘട്ടത്തിൽ തങ്ങളെ തോൽപ്പിച്ച ക്ലബ് ബ്രൂഷിനെ ഒന്നിനെതിരെ മൂന്നു ഗോളുകൾക്ക് ആണ് വില്ല അവരുടെ മൈതാനത്ത് തോൽപ്പിച്ചത്. വില്ല ആധിപത്യം കണ്ട മത്സരത്തിൽ മൂന്നാം മിനിറ്റിൽ ലിയോൺ ബെയ്ലിയിലൂടെ ഇംഗ്ലീഷ് ടീം മുന്നിൽ എത്തി. എന്നാൽ 12 മത്തെ മിനിറ്റിൽ ഗോൾ നേടിയ മാക്‌സിം ഡി കുപ്പർ ആതിഥേയരയെ മത്സരത്തിൽ തിരിച്ചു എത്തിച്ചു.

സമനിലയിലേക്ക് പോകും എന്ന് കരുതിയ മത്സരത്തിൽ 82 മത്തെ മിനിറ്റിൽ ബ്രാൻഡൻ മെഹേലയുടെ സെൽഫ്‌ ഗോൾ വില്ലക്ക് ഭാഗ്യമായി. തുടർന്ന് മാറ്റി ക്യാഷിനെ വീഴ്ത്തിയതിന് ലഭിച്ച പെനാൽട്ടി 88 മത്തെ മിനിറ്റിൽ ലക്ഷ്യം കണ്ട മാർകോ അസൻസിയോ വില്ലയുടെ മികച്ച ജയം ഉറപ്പിക്കുക ആയിരുന്നു. പാരീസിൽ നിന്നു ലോണിൽ എത്തിയ താരത്തിന്റെ ക്ലബിന് ആയുള്ള അഞ്ചാം ഗോൾ ആയിരുന്നു ഇത്. രണ്ടാം പാദത്തിൽ ഈ മുൻതൂക്കം നിലനിർത്തി അവസാന എട്ടിൽ സ്ഥാനം പിടിക്കാൻ ആവും വില്ല ഇറങ്ങുക.

അൽഫോൺസോ ഡേവിസിന്റെ നാടകീയമായ സ്റ്റോപ്പേജ് ടൈം സമനില ഗോളിലൂടെ സെൽറ്റിക്കിനെതിരെ 1-1 സമനില നേടിയതോടെ ബയേൺ മ്യൂണിക്ക് ചാമ്പ്യൻസ് ലീഗിലെ അവസാന 16ലേക്ക് മുന്നേറി, ഈ സമനിലയോടെ 3-2 എന്ന അഗ്രഗേറ്റ് വിജയത്തിലൂടെയാണ് ബയേൺ മുന്നേറിയത്.

63-ാം മിനിറ്റിൽ മുൻ ബയേൺ റിസർവ് കളിക്കാരൻ നിക്കോളാസ് കുഹൻ സെൽറ്റിക്കിനെ മുന്നിലെത്തിച്ചു. ഹാരി കെയ്ൻ ശ്രമം ബാറിൽ തട്ടിയതും, കാസ്പർ ഷ്മൈച്ചൽ നിർണായക സേവുകളും ബയേണെ പിറകിൽ തന്നെ നിർത്തി.

അവസാനം കളി എക്സ്ട്രാ ടൈമിലേക്ക് പോവുകയാണെന്ന് തോന്നിച്ച നിമിഷമാണ്, ഡേവീസ് ഗോൾ നേടിയത്. അടുത്ത റൗണ്ടിൽ ബയേൺ ഇപ്പോൾ ബയേൺ ലെവർകുസനെയോ അത്ലറ്റിക്കോ മാഡ്രിഡിനെയോ ആകും നേരിടുക.

യുഫേഫ ചാമ്പ്യൻസ് ലീഗിൽ അവസാന പതിനാറിലേക്ക് നേരിട്ട് യോഗ്യത കണ്ടെത്തി ആസ്റ്റൺ വില്ല. സ്‌കോട്ടിഷ് ചാമ്പ്യന്മാർ ആയ സെൽറ്റിക്കിനെ ആവേശപോരാട്ടത്തിൽ 4-2 നു തോൽപ്പിച്ച അവർ ഗ്രൂപ്പ് ഘട്ടത്തിൽ എട്ടാം സ്ഥാനം നേടുക ആയിരുന്നു. യുവതാരം മോർഗൻ റോജേഴ്സ് നേടിയ ഹാട്രിക് ആണ് വില്ലക്ക് വലിയ ജയം സമ്മാനിച്ചത്. 3, 5 മിനിറ്റുകളിൽ റോജേഴ്സിലൂടെ വില്ല മുന്നിൽ എത്തിയപ്പോൾ ആദം ഇഡാഹയിലൂടെ 36, 38 മിനിറ്റുകളിൽ സെൽറ്റിക് തിരിച്ചടിച്ചു. എന്നാൽ രണ്ടാം പകുതിയിൽ വില്ല പാർക്കിൽ ഇംഗ്ലീഷ് ക്ലബ് ജയം പിടിച്ചെടുത്തു. 60 മത്തെ മിനിറ്റിൽ വാറ്റ്കിൻസിന്റെ ഗോളിൽ അവർ മുന്നിൽ എത്തി. 67 മത്തെ മിനിറ്റിൽ വാറ്റ്കിൻസ് പെനാൽട്ടി പാഴാക്കി. എന്നാൽ ഇഞ്ച്വറി സമയത്ത് 91 മത്തെ മിനിറ്റിൽ വാറ്റ്കിൻസിന്റെ പാസിൽ നിന്നു ഗോൾ നേടി ഹാട്രിക് പൂർത്തിയാക്കിയ റോജേഴ്സ് വില്ല ജയം ഉറപ്പിച്ചു. പരാജയത്തോടെ 21 സ്ഥാനത്ത് ആയ സെൽറ്റികിന് അവസാന പതിനാറിൽ എത്താൻ പ്ലെ ഓഫ് കളിക്കണം.

ഡച്ച് ക്ലബ് ഫെയനൂർദിനെ 6-1 എന്ന വമ്പൻ സ്കോറിന് സ്വന്തം മൈതാനത്ത് മറികടന്ന ഫ്രഞ്ച് ക്ലബ് ലില്ലെ അപ്രതീക്ഷിതമായി ചാമ്പ്യൻസ് ലീഗ് അവസാന പതിനാറിൽ ഇടം കണ്ടെത്തി. വമ്പൻ ജയത്തോടെ അവർ വില്ലയെ എട്ടാം സ്ഥാനത്തേക്ക് പിന്തള്ളി നേടിയ ഗോളുകളുടെ എണ്ണത്തിന്റെ ബലത്തിൽ അവസാന പതിനാറിലേക്ക് മാർച്ച് ചെയ്തു. ഗ്രൂപ്പ് ഘട്ടത്തിൽ ഏഴാമത് ആണ് അവർ. ചാമ്പ്യൻസ് ലീഗ് ചരിത്രത്തിൽ ആദ്യമായി ഒരു ടീം മൂന്നു സെൽഫ് ഗോളുകൾ നേടിയത് കണ്ട മത്സരം ആയിരുന്നു ഇത്. ഫെയനൂർദിന്റെ ട്രൊനർ 2 തവണ സെൽഫ്‌ ഗോൾ വഴങ്ങുന്നതും കാണാൻ ആയി. വമ്പൻ പരാജയം വഴങ്ങിയെങ്കിലും 19 സ്ഥാനത്ത് എത്താൻ ആയ ഫെയനൂർദിനു പ്ലെ ഓഫ് കളിച്ചു അവസാന പതിനാറിൽ എത്താൻ അവസരം ഉണ്ട്.

ഫ്രഞ്ച് ക്ലബ് മൊണാകോയെ എതിരില്ലാത്ത മൂന്നു ഗോളുകൾക്ക് തോൽപ്പിച്ചു യുഫേഫ ചാമ്പ്യൻസ് ലീഗ് ഗ്രൂപ്പ് ഘട്ടത്തിൽ നാലാം സ്ഥാനം ഉറപ്പിച്ചു ഇന്റർ മിലാൻ. ഹാട്രിക് നേടിയ അർജന്റീനൻ താരം ലൗടാരോ മാർട്ടിനസ് ആണ് ഇന്ററിന് വലിയ ജയം സമ്മനിച്ചത്. 12 മത്തെ മിനിറ്റിൽ ചുവപ്പ് കാർഡ് കണ്ടു ക്രിസ്റ്റിയൻ പുറത്തായത് ഫ്രഞ്ച് ക്ലബിന് തിരിച്ചടി ആയിരുന്നു. നാലാം മിനിറ്റിൽ പെനാൽട്ടിയിലൂടെ ഗോൾ വേട്ട തുടങ്ങിയ മാർട്ടിനസ് 16, 67 മിനിറ്റുകളിൽ നേടിയ ഗോളുകളിലൂടെയാണ്‌ തന്റെ ഹാട്രിക് പൂർത്തിയാക്കിയത്. ഗ്രൂപ്പ് ഘട്ടത്തിൽ 8 കളികളിൽ നിന്നു വെറും ഒരു ഗോൾ മാത്രമാണ് ഇന്റർ ഇത് വരെ വഴങ്ങിയത് എന്നതും ശ്രദ്ധേയമാണ്. പരാജയത്തോടെ 17 സ്ഥാനത്ത് ആയ മൊണാകോക്ക് ഇതോടെ അവസാന പതിനാറിൽ എത്താൻ പ്ലെ ഓഫ് കളിക്കണം.

അതേസമയം ഇതിനകം ഗ്രൂപ്പ് ഘട്ടത്തിൽ പുറത്തായ സ്പാർട്ട പ്രാഗയെ എതിരില്ലാത്ത 2 ഗോളിന് മറികടന്നു ബയേർ ലെവർകുസൻ ആദ്യ എട്ടിൽ സ്ഥാനം ഉറപ്പിച്ചു. ജയത്തോടെ ആറാം സ്ഥാനം ഉറപ്പിച്ച അവർ നേരിട്ടു അവസാന പതിനാറിലേക്ക് യോഗ്യത നേടി. 32 മത്തെ മിനിറ്റിൽ ഫ്രിംപോങ്ങിന്റെ പാസിൽ നിന്നു ഗോൾ നേടിയ ഫ്ലോറിയൻ റിറ്റ്സ് ആണ് ജർമ്മൻ ക്ലബിന് മുൻതൂക്കം നൽകിയത്. എട്ടാം മത്സരത്തിൽ നിന്നു ചാമ്പ്യൻസ് ലീഗിലെ ആറാം ഗോൾ ആയിരുന്നു ജർമ്മൻ താരത്തിന് ഇത്. തുടർന്ന് 64 മത്തെ മിനിറ്റിൽ നാഥൻ ടെല്ല നേടിയ ഗോൾ ലെവർകുസൻ ജയം ഉറപ്പിക്കുക ആയിരുന്നു.

യുഫേഫ ചാമ്പ്യൻസ് ലീഗിൽ ഗ്രൂപ്പ് ഘട്ടത്തിൽ ഒന്നാം സ്ഥാനത്ത് എത്താനുള്ള അവസരം നഷ്ടമാക്കി ബാഴ്‌സലോണ. ഇറ്റാലിയൻ ക്ലബ് അറ്റലാന്റക്ക് എതിരെ 2 തവണ മുന്നിട്ട് നിന്ന ശേഷവും സമനില വഴങ്ങിയ അവർ രണ്ടാം സ്ഥാനക്കാർ ആയാണ് ഗ്രൂപ്പ് ഘട്ടം പൂർത്തിയാക്കിയത്. റഫീന്യോയുടെ പാസിൽ നിന്നു ലമീൻ യമാൽ ആണ് 47 മത്തെ മിനിറ്റിൽ ബാഴ്‌സക്ക് മുൻതൂക്കം നൽകിയത് എന്നാൽ എഡേഴ്സൻ 20 മിനിറ്റിനുള്ളിൽ ഗോൾ തിരിച്ചടിച്ചു. തുടർന്ന് റഫീന്യോയുടെ പാസിൽ നിന്നു റൊണാൾഡ് അരോഹോ 72 മത്തെ മിനിറ്റിൽ ഗോൾ നേടിയെങ്കിലും 77 മത്തെ മിനിറ്റിൽ മരിയോ പസാലിച്ചിലൂടെ ഇറ്റാലിയൻ ക്ലബ് രണ്ടാം ഗോളും മടക്കി. സമനില വഴങ്ങിയതോടെ ആദ്യ എട്ടിലെ സ്ഥാനം കൈവിട്ട അറ്റലാന്റ ഒമ്പതാം സ്ഥാനത്ത് ആണ്, ഇതോടെ അവസാന പതിനാറിൽ എത്താൻ ഇവർക്ക് പ്ലെ ഓഫ് കളിക്കേണ്ടി വരും.

അതേസമയം 4-1 നു ആർ.ബി സാൽസ്ബർഗിനെ മറികടന്ന മറ്റൊരു സ്പാനിഷ് ക്ലബ് അത്ലറ്റികോ മാഡ്രിഡ് ആദ്യ എട്ടിലെ സ്ഥാനം ഉറപ്പിച്ചു. 34 സ്ഥാനക്കാർ ആയ ഓസ്ട്രിയൻ ക്ലബിന് എതിരായ ജയത്തോടെ അഞ്ചാം സ്ഥാനം ആണ് സിമിയോണിയുടെ ടീം ഉറപ്പിച്ചത്. ചാമ്പ്യൻസ് ലീഗിൽ ഉഗ്രൻ ഫോമിലുള്ള അന്റോണിയോ ഗ്രീസ്മാന്റെ മികവ് ആണ് അത്ലറ്റികോക്ക് മികച്ച ജയം സമ്മാനിച്ചത്. അഞ്ചാം മിനിറ്റിൽ ജൂലിയൻ അൽവാരസിന്റെ പാസിൽ നിന്നു ഗുലിയാനോ സിമിയോണി ആണ് അവരുടെ ഗോൾ വേട്ട ആരംഭിച്ചത്. തുടർന്ന് 13, 45 മിനിറ്റിനുള്ളിൽ ഗോൾ നേടിയ ഗ്രീസ്മാൻ അത്ലറ്റികോ ജയം ഉറപ്പിച്ചു. രണ്ടാം പകുതിയിൽ 63 മത്തെ മിനിറ്റിൽ റോഡ്രിഗോ ഡി പോളിന്റെ പാസിൽ നിന്നു ഗോൾ നേടിയ മാർക്കോസ് യോറന്റെ അത്ലറ്റികോ ജയം പൂർത്തിയാക്കി. 91 മത്തെ മിനിറ്റിൽ ആദം ഡാഹിം ആണ് ഓസ്ട്രിയൻ ടീമിന് ആയി ആശ്വാസ ഗോൾ നേടിയത്.

യുഫേഫ ചാമ്പ്യൻസ് ലീഗിൽ മൂന്നാം സ്ഥാനം ഉറപ്പിച്ചു അവസാന പതിനാറിലേക്ക് മുന്നേറി ആഴ്‌സണൽ. ചാമ്പ്യൻസ് ലീഗിൽ നിന്നു ഇതിനകം പുറത്തായ ജിറോണയെ അവരുടെ മൈതാനത്ത് 2-1 നു ആണ് ആഴ്‌സണൽ മറികടന്നത്. ബാഴ്‌സലോണ, ആഴ്‌സണൽ, ഇന്റർ മിലാൻ എന്നിവർക്ക് ഗ്രൂപ്പ് ഘട്ടത്തിൽ 19 പോയിന്റുകൾ ആണ് ഉള്ളത് എന്നതിനാൽ ഗോൾ വ്യത്യാസം ആണ് സ്ഥാനങ്ങൾ തീരുമാനിച്ചത്. ആദ്യം ഗോൾ വഴങ്ങിയ ശേഷം ആണ് ആഴ്‌സണൽ മത്സരത്തിൽ ജയം കണ്ടത്. 28 മത്തെ മിനിറ്റിൽ ജുവാനപയുടെ മികച്ച ത്രൂ ബോളിൽ നിന്നു ദഞ്ചുമ ഇന്ന് ആഴ്‌സണലിന് ആയി അരങ്ങേറ്റം കുറിച്ച ഗോൾ കീപ്പർ നെറ്റോയെ മറികടക്കുക ആയിരുന്നു.

പെനാൽട്ടി ബോക്സിനു വളരെ കയറി നിന്ന നെറ്റോയെ മികച്ച ഫിനിഷിലൂടെ താരം മറികടക്കുക ആയിരുന്നു. നിരവധി താരങ്ങൾക്ക് വിശ്രമം നൽകി എത്തിയ ആഴ്‌സണൽ 38 മത്തെ മിനിറ്റിൽ ഒപ്പം എത്തി. പാർട്ടിയെ വീഴ്ത്തിയതിന് ലഭിച്ച പെനാൽട്ടി ജോർജീന്യോ ലക്ഷ്യം കാണുക ആയിരുന്നു. തുടർന്ന് നാലു മിനിറ്റിനുള്ളിൽ ട്രൊസാർഡിന്റെ പാസിൽ നിന്നു സാകയെ ഓർമ്മിപ്പിച്ചു ഉഗ്രൻ ഷോട്ടിലൂടെ 17 കാരനായ യുവതാരം ഏഥൻ ന്വനെരി ആഴ്‌സണലിന് വിജയഗോൾ സമ്മാനിച്ചു. രണ്ടാം പകുതിയിൽ സ്റ്റുവാനിയിലൂടെ സ്പാനിഷ് ടീം സമനില കണ്ടെത്തിയത് ആയി തോന്നിയെങ്കിലും ഈ ഗോൾ വാർ ഓഫ് സൈഡ് ആണെന്ന് കണ്ടെത്തി. തുടർന്ന് അവസാന നിമിഷങ്ങളിൽ ഹാന്റ് ബോളിന് ആഴ്‌സണലിന് പെനാൽട്ടി ലഭിച്ചു എങ്കിലും പെനാൽട്ടി എടുത്ത റഹീം സ്റ്റെർലിങിന്റെ ശ്രമം ഗോൾ കീപ്പർ പൗ ലോപ്പസ് തടഞ്ഞു.