യുഫേഫ ചാമ്പ്യൻസ് ലീഗിൽ അവസാന ഗ്രൂപ്പ് ഘട്ടത്തിൽ പരാജയപ്പെട്ടു ആദ്യ എട്ടിൽ എത്താനുള്ള സുവർണ അവസരം പാഴാക്കി എ.സി മിലാൻ. ക്രൊയേഷ്യൻ ക്ലബ് ഡൈനാമോ സാഗ്രബിനു എതിരെ ജയിച്ചിരുന്നു എങ്കിൽ ആറാം സ്ഥാനം ഉറപ്പായിരുന്ന അവർ 2-1 പരാജയപ്പെട്ടു 13 സ്ഥാനത്തേക്ക് വീണു. അതേസമയം ജയിച്ചു എങ്കിലും 25 മത് ആയ ഡൈനാമോ ടൂർണമെന്റിൽ നിന്നും പുറത്തായി. ആദ്യ പകുതിയിൽ തന്നെ യൂനുസ് മുസ രണ്ടാം മഞ്ഞ കാർഡ് കണ്ടു പുറത്ത് പോയത് ആണ് മിലാന് വിനയായത്. മാർട്ടിൻ, മാർക്കോ എന്നിവരുടെ ഗോളിന് ഡൈനാമോ ജയം കണ്ടപ്പോൾ പുലീസിക് ആണ് മിലാന്റെ ആശ്വാസ ഗോൾ നേടിയത്.
അതേസമയം സ്വന്തം മൈതാനത്ത് യുവന്റസ് എതിരില്ലാത്ത 2 ഗോളിന് ബെൻഫിക്കയോട് പരാജയപ്പെടുന്നതും ഇന്ന് കാണാൻ ആയി. ആദ്യ എട്ടിന് സാധ്യതകൾ ഇല്ലാത്ത ഇരു ക്ലബും നടന്ന മത്സരത്തിൽ പ്ലെ ഓഫ് കളിക്കാൻ ജയം അത്യാവശ്യം ആയിരുന്ന ബെൻഫിക്ക അത് നേടിയെടുക്കുക ആയിരുന്നു. ഗോളും അസിസ്റ്റും ആയി കഴിഞ്ഞ കളിയിലെ ഹാട്രിക് ഹീറോ ആയ ഇവാഞ്ചലസ് പാവ്ലിദിസ് തിളങ്ങിയ മത്സരം ആയിരുന്നു ഇത്. ജയത്തോടെ 13 പോയിന്റുകളും ആയി ബെൻഫിക്ക 16 സ്ഥാനത്തും 12 പോയിന്റുകൾ ഉള്ള യുവന്റസ് ഇരുപതാം സ്ഥാനത്തും ആണ് ഗ്രൂപ്പ് ഘട്ടത്തിൽ സ്ഥാനം ഉറപ്പിച്ചത്. ഇരു ടീമുകൾക്കും ഇതോടെ അവസാന പതിനാറിൽ എത്താൻ പ്ലെ ഓഫ് കളിക്കണം.