ബയേൺ മ്യൂണിക്കിന് തിരിച്ചടി, ലെവൻഡോസ്‌കി ഒരു മാസത്തോളം പുറത്ത്

ബയേൺ മ്യൂണിക് സൂപ്പർ താരം റോബർട്ട് ലെവൻഡോസ്‌കി പരിക്ക് മൂലം ഒരു മാസത്തോളം പുറത്ത്. കഴിഞ്ഞ ദിവസം നടന്ന പോളണ്ടിന്റെ അണ്ടോറക്കെതിരായ മത്സരത്തിനിടെയാണ് താരത്തിന് പരിക്കേറ്റത്. തുടർന്ന് താരം ഇംഗ്ലണ്ടിനെതിരായ പോളണ്ടിന്റെ മത്സരത്തിന് ഉണ്ടാവില്ലെന്ന് നേരത്തെ തന്നെ ഉറപ്പായിരുന്നു. താരത്തിന്റെ കാൽമുട്ടിനേറ്റ പരിക്ക് ഗുരുതരമാണെന്നും താരം ഒരു മാസത്തോളം പുറത്തിരിക്കേണ്ടിവരുമെന്നും ബയേൺ മ്യൂണിക് വ്യക്തമാക്കി.

ചാമ്പ്യൻസ് ലീഗിൽ പി.എസ്.ജിയെ നേരിടാൻ ഒരുങ്ങുന്ന ബയേൺ മ്യൂണിക്കിന് കനത്ത തിരിച്ചടിയാണ് ലെവൻഡോസ്‌കിയുടെ പരിക്ക്. സീസണിൽ 42 ഗോളുകളുമായി ലെവൻഡോസ്‌കി മികച്ച ഫോമിലിരിക്കെയാണ് താരത്തിന് പരിക്കേറ്റത്. കൂടാതെ ബയേൺ മ്യൂണിക് ചാമ്പ്യൻസ് ലീഗ് എത്തിയാൽ താരത്തിന് സെമി ഫൈനൽ പോരാട്ടത്തിന്റെ ആദ്യ പാദവും നഷ്ടമാവുമെന്നാണ് കരുതപ്പെടുന്നത്.