ലോകകപ്പിൽ ഗോൾ വേട്ടയിൽ ദൈവത്തിനു ഒപ്പമെത്തി ദൈവപുത്രൻ. ഡീഗോ മറഡോണയുടെ രണ്ടാം ഓർമ്മ ദിനത്തിന് ശേഷം നടന്ന ജയം നിർബന്ധം ആയ മത്സരത്തിൽ ഡീഗോ മറഡോണയുടെ ലോകകപ്പ് ഗോൾ റെക്കോർഡിനു ഒപ്പം ലയണൽ മെസ്സി എത്തി. ഇന്ന് തന്റെ 21 മത്തെ ലോകകപ്പ് മത്സരം കളിച്ച മെസ്സി മറഡോണയുടെ റെക്കോർഡിന് ഒപ്പം എത്തിയിരുന്നു.
മെക്സിക്കോക്ക് എതിരെ അർജന്റീനക്ക് ജീവൻ തിരിച്ചു നൽകി രണ്ടാം പകുതിയിൽ ബോക്സിന് പുറത്ത് നിന്ന് ഗോൾ നേടി നൽകിയ മെസ്സി ലോകകപ്പിൽ തന്റെ എട്ടാം ഗോൾ ആണ് കുറിച്ചത്. ഇതോടെ ലോകകപ്പ് ഗോൾ വേട്ടയിൽ ഡീഗോ മറഡോണക്ക് ഒപ്പവും മെസ്സി എത്തി. മത്സരത്തിൽ എൻസോ ഫെർണാണ്ടസിന് ഗോൾ അടിക്കാൻ അവസരം ഒരുക്കിയതും മെസ്സി ആയിരുന്നു. തുടർച്ചയായ ആറാം അന്താരാഷ്ട്ര മത്സരത്തിൽ ആണ് ഇന്ന് മെസ്സി ഗോൾ നേടിയത്, ഇത് കരിയറിൽ രണ്ടാം തവണയാണ് മെസ്സി ഈ നേട്ടം കൈവരിക്കുന്നത്.
