അടുത്താഴ്ച ഐസിസി ടി20 ലോകകപ്പ് മാറ്റി വയ്ക്കണോ വേണ്ടയോ എന്നതിന്മേലൊരു തീരുമാനം എടുക്കുന്നതിനുള്ള ചര്‍ച്ചയ്ക്ക് ഒരുങ്ങുന്നുവെന്നാണ് ലഭിയ്ക്കുന്ന വിവരം. ഇതിന്മേലൊരു തീരുമാനം വേഗത്തിലാവണമെന്ന് ഓസ്ട്രേലിയയ്ക്ക് അകത്ത് നിന്ന് തന്നെ ആവശ്യം ഉയര്‍ന്നിരുന്നു. മുന്‍ ഓസ്ട്രേലിയന്‍ താരം മാര്‍ക്ക് ടെയിലര്‍ ടൂര്‍ണ്ണമെന്റ് മാറ്റി വയ്ക്കണമെന്നാണ് ആവശ്യപ്പെട്ടത്.
അതേ സമയം തീരുമാനം എന്ത് തന്നെയായാലും അത് വേഗത്തിലാവുന്നതായിരിക്കും നല്ലതെന്നാണ് മാര്‍ക്ക് ടെയിലര്‍ അഭിപ്രായപ്പെട്ടത്. തന്റെ ഒരു തോന്നല്‍ ഒക്ടോബറിലോ നവംബറിലോ ലോകകപ്പ് മര്യാദയ്ക്ക് ഓസ്ട്രേലിയയില്‍ നടത്താനാകില്ല എന്നാണ്, അതിനാല്‍ തന്നെ മാറ്റി വയ്ക്കുകയെന്നതാണ് നല്ല തീരുമാനം.
അല്ല ഐസിസിയുടെ നിലപാട് വേറെ ആണെങ്കില്‍ തന്നെ അത് എത്രയും പെട്ടെന്ന് തീരുമാനിക്കുന്നതാണ് നല്ലത്. അങ്ങനെയെങ്കില്‍ പ്ലാനിംഗുകളുമായി മുന്നോട്ട് പോകുവാനും വ്യക്തതയുണ്ടാകുമെന്നും ടെയിലര്‍ അഭിപ്രായപ്പെട്ടു.
