ഇംഗ്ലീഷ് പ്രീമിയർ ലീഗിൽ വിജയവഴിയിൽ തിരിച്ചെത്തി ആഴ്‌സണൽ. കഴിഞ്ഞ കളിയിൽ ചെൽസിയോട് സമനില വഴങ്ങിയ ആഴ്‌സണൽ ഇന്ന് സ്വന്തം മൈതാനത്ത് എതിരില്ലാത്ത 5 ഗോളുകൾക്ക് ആണ് ലീഗിലെ അവസാന സ്ഥാനക്കാർ ആയ ഷെഫീൽഡ് യുണൈറ്റഡിനെ തകർത്തത്. നിരവധി മാറ്റങ്ങളും ആയി ആഴ്‌സണൽ മത്സരത്തിന് എത്തിയത്. മുന്നേറ്റത്തിൽ പരിക്കേറ്റ ഗബ്രിയേൽ ജീസുസിന് പകരക്കാരനായി ഇറങ്ങിയ എഡി എൻകെതിയയുടെ ആദ്യ പ്രീമിയർ ലീഗ് ഹാട്രിക് ആണ് ആഴ്‌സണലിന് വമ്പൻ ജയം സമ്മാനിച്ചത്. ആഴ്‌സണലിനെ നന്നായി തുടക്കത്തിൽ പ്രതിരോധിക്കാൻ ഷെഫീൽഡിന് ആയിരുന്നു. എന്നാൽ 28 മത്തെ മിനിറ്റിൽ ആ പ്രതിരോധ പൂട്ട് ആഴ്‌സണൽ മറികടന്നു.
ഡക്ലൻ റൈസ് നൽകിയ മനോഹരമായ പാസിൽ നിന്നു അതി സുന്ദരമായി പന്ത് കാലിലാക്കിയ എഡി ഗോളിലൂടെ ആഴ്‌സണലിനെ മത്സരത്തിൽ മുന്നിൽ എത്തിച്ചു. ആദ്യ പകുതിയിൽ തുടർന്നും അവസരം ഉണ്ടാക്കിയെങ്കിലും തുടർന്ന് ഗോൾ നേടാൻ ആഴ്‌സണലിന് ആയില്ല. എന്നാൽ രണ്ടാം പകുതിയിൽ ആഴ്‌സണൽ ആക്രമണം കടുപ്പിച്ചു. ബുകയോ സാകയുടെ കോർണറിൽ നിന്നു ലഭിച്ച അവസരത്തിൽ ഉഗ്രൻ ഷോട്ടിലൂടെ 50 മത്തെ മിനിറ്റിൽ ആഴ്‌സണൽ രണ്ടാം ഗോൾ നേടി. 8 മിനിറ്റിനുള്ളിൽ എമിൽ സ്മിത്ത്-റോ നൽകിയ പാസിൽ നിന്നു ബോക്സിനു പുറത്ത് നിന്ന് അതുഗ്രൻ അവിസ്മരണീയ ബുള്ളറ്റ് ഷോട്ടിലൂടെ എഡി തന്റെ ഹാട്രിക് പൂർത്തിയാക്കുക ആയിരുന്നു. 3 ഗോൾ നേടിയിട്ടും ആഴ്‌സണൽ ആക്രമണം നിർത്തിയില്ല.
ബെൻ വൈറ്റിന്റെ ഉഗ്രൻ ഷോട്ട് ഷെഫീൽഡ് ഗോൾ കീപ്പർ കഷ്ടിച്ച് ആണ് രക്ഷിച്ചത്. 88 മത്തെ മിനിറ്റിൽ പകരക്കാരനായി ഇറങ്ങിയ ഫാബിയോ വിയേര തന്നെ വീഴ്‌ത്തിയതിനു ലഭിച്ച പെനാൽട്ടി ലക്ഷ്യം കണ്ടു ആഴ്‌സണലിന്റെ നാലാം ഗോൾ നേടി. സീസണിലെ താരത്തിന്റെ ആദ്യ ഗോൾ ആയിരുന്നു ഇത്. വാർ പരിശോധനക്ക് ശേഷമാണ് ആഴ്‌സണലിന് പെനാൽട്ടി അനുവദിക്കപ്പെട്ടത്. ഇഞ്ച്വറി സമയത്ത് മറ്റൊരു കോർണറിൽ നിന്നു ലഭിച്ച അവസരം ലക്ഷ്യം കണ്ട പകരക്കാരനായി ഇറങ്ങിയ ടോമിയാസു ആണ് ആഴ്‌സണൽ ജയം പൂർത്തിയാക്കിയത്. തന്റെ 50 മത്സരത്തിൽ ആഴ്‌സണലിന് ആയി ജപ്പാൻ താരം നേടുന്ന ആദ്യ ഗോൾ ആയിരുന്നു ഇത്. വമ്പൻ ജയത്തോടെ ലീഗിൽ രണ്ടാം സ്ഥാനത്തേക്ക് ആഴ്‌സണൽ കയറി.
