ഇന്നത്തെ ന്യൂസിലാണ്ടിന്റെ ഇന്ത്യയ്ക്കെതിരെയുള്ള മത്സരം നടക്കാത്തതില്‍ യാതൊരുവിധ അത്ഭുതവുമില്ലെന്ന് പറഞ്ഞ് കെയിന്‍ വില്യംസണ്‍. തങ്ങളുടെ ടീം ട്രെന്റ് ബ്രിഡ്ജില്‍ എത്തിയിട്ട് നാല് ദിവസമായി. ഇതില്‍ ഒരു ദിവസം പോലും സൂര്യനെ കണ്ടിരുന്നില്ല, അതിനാല്‍ തന്നെ ഈ തീരുമാനത്തില്‍ യാതൊരുവിധ അത്ഭുതവുമില്ലെന്ന് ന്യൂസിലാണ്ട് നായകന്‍ പറഞ്ഞു.
അടുത്ത മത്സരത്തിനു മുമ്പ് ഇപ്പോള്‍ വലിയൊരു ഇടവേളയാണ് ടീമിനു ലഭിച്ചതെന്ന് കെയിന്‍ വില്യംസണ്‍ പറഞ്ഞു. ദക്ഷിണാഫ്രിക്ക മികച്ച ടീമാണെന്നും അവര്‍ വര്‍ദ്ധിച്ച വീര്യത്തോടെയാവും ഇനിയുള്ള മത്സരങ്ങളെ സമീപിക്കുകയെന്നും ന്യൂസിലാണ്ട് നായകന്‍ വ്യക്തമാക്കി. ടൂര്‍ണ്ണമെന്റിലെ ഓരോ മത്സരങ്ങളും സുപ്രധാനമാണെന്നും അവയിലെല്ലാം മികച്ച പ്രകടനമാണ് പുറത്തെടുക്കേണ്ടതെന്നും കെയിന്‍ വില്യംസണ്‍ അഭിപ്രായപ്പെട്ടു.
