ഇമ്രാന്‍ താഹിറിന്റെ മികവില്‍ സിംബാബ്‍വേയെ ആദ്യ ടി20യില്‍ പരാജയപ്പെടുത്തി ദക്ഷിണാഫ്രിക്ക. ആദ്യം ബാറ്റ് ചെയ്ത ദക്ഷിണാഫ്രിക്ക 20 ഓവറുകളില്‍ നിന്ന് 160/6 എന്ന സ്കോര്‍ നേടിയപ്പോള്‍ 17.2 ഓവറില്‍ സിംബാബ്‍വേയെ 126 റണ്‍സിനു ഓള്‍ഔട്ട് ആക്കി ടീം 34 റണ്‍സിന്റെ ജയം സ്വന്തമാക്കി. 5 വിക്കറ്റ് നേടിയ ഇമ്രാന്‍ താഹിറിന്റെ പ്രകടനമാണ് സിംബാബ്‍വേയുടെ നടുവൊടിച്ചത്. ജൂനിയര്‍ ഡാല, ആന്‍ഡിലെ ഫെഹ്ലുക്വായോ എന്നിവരും ദക്ഷിണാഫ്രിക്കയ്ക്കായി രണ്ട് വീതം വിക്കറ്റ് നേടി. 44 റണ്‍സ് നേടിയ പീറ്റര്‍ മൂറും 14 പന്തില്‍ നിന്ന് 28 റണ്‍സ് നേടിയ ബ്രണ്ടന്‍ മാവുട്ടയുമാണ് സിംബാബ്‍വേ ബാറ്റിംഗ് നിരയില്‍ തിളങ്ങിയത്.
നേരത്തെ ആദ്യം ബാറ്റ് ചെയ്ത ദക്ഷിണാഫ്രിക്കയ്ക്കായി റാസി വാന്‍ ഡെര്‍ ഡൂസ്സെന്‍ 56 റണ്‍സ് നേടിയപ്പോള്‍ ഫാഫ് ഡു പ്ലെസി(34), ഡേവിഡ് മില്ലര്‍(39) എന്നിവരും ബാറ്റിംഗില്‍ തിളങ്ങി. കൈല്‍ ജാര്‍വിസ് മൂന്ന് വിക്കറ്റും ക്രിസ് പോഫു 2 വിക്കറ്റും സിംബാബ്‍വേയ്ക്കായി നേടി.
