ഉന്മുക്ത് ചന്ദ് ഡല്‍ഹി ടി20 ടീമില്‍

മുന്‍ അണ്ടര്‍-19 ലോകകപ്പ് ജേതാവും(നായകനും) വരും കാലത്തെ മികച്ച താരമായി മാറുമെന്നും ഏറെ വിലയിരുത്തപ്പെട്ട ഉന്മുക്ത് ചന്ദ് ഡല്‍ഹി ടി20 ടീമില്‍. ഏറെ പ്രതീക്ഷകളുമായാണ് താരം ജുനിയര്‍ ക്രിക്കറ്റില്‍ നിന്ന് എത്തിയതെങ്കിലും ആ പ്രകടനം പിന്നീട് തുടരാന്‍ താരത്തിനു സാധിക്കാതെ വന്നപ്പോള്‍ ഐപിഎലിലും പിന്നീട് സംസ്ഥാന ടീമിലും ഇടം പിടിക്കുവാന്‍ താരം ബുദ്ധിമുട്ടുകയായിരുന്നു. ഇപ്പോള്‍ രഞ്ജിയില്‍ നിന്ന് ഒഴിവാക്കപ്പെട്ട താരം ഏവരെയും ഞെട്ടിച്ച് ഡല്‍ഹിയുടെ ടി20 ടീമിിലേക്ക് തിരികെ എത്തിയിരിക്കുകയാണ്. സയ്യദ് മുഷ്താഖ് അലി ട്രോഫിയുടെ സൂപ്പര്‍ ലീഗിലേക്ക് ഡല്‍ഹി യോഗ്യത നേടിയപ്പോളാണ് ഉന്മുക്ത് ചന്ദിനെ പോലെ സീനിയര്‍ താരങ്ങളെ ഡല്‍ഹി തിരികെ ടീമിലെത്തിച്ചത്.

U-23 ഏകദിന ടൂര്‍ണ്ണമെന്റും ടി20 ലീഗിനു സമാന്തരമായി നടക്കുന്നതിനാല്‍ ടി20 സ്ക്വാഡിലുള്ള ചില താരങ്ങളെ U-23 ടീമില്‍ ഉള്‍പ്പെടുത്തിയിരുന്നു. അപ്പോള്‍ ടീമില്‍ വന്ന ഒഴിവുകളിലേക്കാണ് ചന്ദിനെപ്പോലുള്ള താരങ്ങള്‍ മടങ്ങിയെത്തിയതെന്നാണ് മനസ്സിലാക്കുവാന്‍ കഴിയുന്നത്. ഋഷഭ് പന്ത് മിന്നും ഫോമില്‍ കളിക്കുന്ന ഡല്‍ഹിയെ പ്രദീപ് സാംഗ്വാന്‍ ആണ് നയിക്കുന്നത്.

കൂടുതൽ കായിക വാർത്തകൾക്ക് : www.facebook.com/FanportOfficial