ഇന്ത്യയിൽ ആകമാനം കൊറോണ വൈറസ് പടരുന്നതിനിടെ അതിനെതിരെ പോരാടാൻ ഇന്ത്യൻ ബാറ്റ്സ്മാൻ സുരേഷ് റെയ്നയുടെ സഹായം. 52 ലക്ഷം രൂപയാണ് സുരേഷ് റെയ്ന കൊറോണ വൈറസിനെതിരായ പോരാട്ടത്തിന് വേണ്ടി സംഭാവനയായി നൽകിയത്. 31 ലക്ഷം രൂപ പ്രധാനമന്ത്രിയുടെ ദുരിതാശ്വാസ നിധിയിലേക്കും 21 ലക്ഷം രൂപ ഉത്തർപ്രദേശ് മുഖ്യമന്ത്രിയുടെ ദുരിതാശ്വാസ നിധിയിലേക്കുമാണ് റെയ്ന സംഭാവന ചെയ്തത്. മറ്റുള്ളവരോട് ദുരിതാശ്വാസ ഫണ്ടിലേക്ക് സംഭാവന ചെയ്യാൻ സുരേഷ് റെയ്ന അഭ്യർത്ഥിക്കുകയും ചെയ്തിട്ടുണ്ട്.
നിലവിൽ ഇന്ത്യൻ സൂപ്പർ ലീഗിൽ ചെന്നൈ സൂപ്പർ കിങ്സിന്റെ താരമാണ് സുരേഷ് റെയ്ന. ഇന്ത്യക്ക് വേണ്ടി 18 ടെസ്റ്റ് മത്സരങ്ങളും 226 ഏകദിന മത്സരങ്ങളും 78 ടി20 മത്സരങ്ങളും സുരേഷ് റെയ്ന കളിച്ചിട്ടുണ്ട്. നേരത്തെ മുൻ ഇന്ത്യൻ താരം സച്ചിൻ ടെണ്ടുൽക്കറും മുൻ ഇന്ത്യൻ ക്യാപ്റ്റൻ മഹേന്ദ്ര സിംഗ് ധോണിയുമടക്കം നിരവധി കായിക താരങ്ങൾ കോറോണക്കെതിരായുള്ള പോരാട്ടത്തിന് സംഭാവനയുമായി രംഗത്തെത്തിയിട്ടുണ്ട്.
