ലോര്‍ഡ്സ് ടെസ്റ്റിൽ ഇംഗ്ലണ്ട് നിരയിൽ സ്റ്റുവര്‍ട് ബ്രോഡ് കളിച്ചേക്കില്ലെന്ന് സൂചന. താരത്തിന്റെ വലത് കാല്‍വണ്ണയിലെ പരിക്ക് കാരണം താരം രണ്ടാം ടെസ്റ്റിൽ കളിക്കില്ലെന്നാണ് അറിയുന്നത്. എന്നാൽ അന്തിമ തീരുമാനം ഇന്ന് നടത്തുന്ന സ്കാനുകള്‍ക്ക് ശേഷം മാത്രമാവും പുറത്ത് വിടുക.
ട്രെന്റ് ബ്രിഡ്ജിലെ ആദ്യ ടെസ്റ്റിൽ താരത്തിന് ഒരു വിക്കറ്റ് മാത്രമേ നേടാനായിരുന്നുള്ളു. എന്നാൽ ലോര്‍ഡ്സിൽ മികച്ച റെക്കോര്‍ഡുള്ള താരമാണ് സ്റ്റുവര്‍ട് ബ്രോഡ്. 95 ടെസ്റ്റ് വിക്കറ്റുകള്‍ താരം ലോര്‍ഡ്സിൽ മാത്രം നേടിയിട്ടുണ്ട്.
ബ്രോഡിന്റെ പരിക്ക് മോയിന്‍ അലിയ്ക്ക് ടീമിൽ ഇടം നല്‍കുമെന്നാണ് വിലയിരുത്തപ്പെടുന്നത്. ടീമിൽ മാര്‍ക്ക് വുഡ് ആണ് റിസര്‍വ് താരമായി ഉള്ളത്. ജോഫ്ര ആര്‍ച്ചര്‍, ക്രിസ് വോക്സ്, ഒല്ലി സ്റ്റോൺ എന്നിവര്‍ പരിക്കിന്റെ പിടിയിലാണ്. ബെന്‍ സ്റ്റോക്സ് ക്രിക്കറ്റിൽ നിന്ന് നീണ്ട ഇടവേളയെടുക്കുകയും ചെയ്തു.
