ഡൽഹിക്കെതിരെയുള്ള രഞ്ജി ട്രോഫി മത്സരത്തിൽ കേരളത്തിന് കൂറ്റൻ ലീഡ്. ഡൽഹിയെ 142 റൺസിന് കേരള ബൗളർമാർ ഓൾ ഔട്ട് ആക്കിയ കേരളം ആദ്യ ഇന്നിങ്സിൽ 383റൺസിന്റെ ലീഡ് സ്വന്തമാക്കുകയായിരുന്നു. ഡൽഹിയെ ഫോളോ ഓൺ ചെയ്യിച്ച് വിജയം സ്വന്തമാക്കാനാണ് കേരളത്തിന്റെ ശ്രമം. ഡൽഹി നിരയിൽ 25 റൺസ് വീതം എടുത്ത നവദീപ് സെയ്നിയും നിതീഷ് റാണയുമാണ് ടോപ് സ്കോറർമാർ.
കേരളത്തിന് വേണ്ടി 6 വിക്കറ്റ് നേടിയ ജലജ് സക്‌സേനയുടെ പ്രകടനമാണ് ഡൽഹിയെ ചെറിയ സ്‌കോറിൽ ഒതുക്കുന്നതിന് സഹായിച്ചത്. കേരളത്തിന് വേണ്ടി സിജോമോൻ ജോസഫ് രണ്ട് വിക്കറ്റും സന്ദീപ് വാര്യരും മോനിഷും ഓരോ വിക്കറ്റ് വീതം വീഴ്ത്തി. നേരത്തെ ആദ്യ ഇന്നിങ്സിൽ കേരളം 9 വിക്കറ്റ് നഷ്ടത്തിൽ 525 റൺസ് എടുത്തിരുന്നു.
