കോവിഡ് കാരണം മാറ്റിവെച്ച രണ്ടാം ഏകദിനം ഇന്നലെ നടന്നപ്പോള്‍ 4 വിക്കറ്റ് വിജയവുമായി വെസ്റ്റിന്‍ഡീസ്. വിജയത്തോടെ പരമ്പരയിൽ ഇരു ടീമുകളും ഒപ്പത്തിനൊപ്പമെത്തുകയായിരുന്നു. ആദ്യം ബാറ്റ് ചെയ്ത ഓസ്ട്രേലിയ 47.1 ഓവറിൽ 187 റൺസിന് ഓള്‍ഔട്ട് ആകുകയായിരുന്നു. ലക്ഷ്യം 38 ഓവറിൽ 6 വിക്കറ്റ് നഷ്ടത്തിലാണ് വിന്‍ഡീസ് മറികടന്നത്.
മൂന്ന് വീതം വിക്കറ്റ് നേടി അകീൽ ഹൊസൈനും അല്‍സാരി ജോസഫുമാണ് ഓസ്ട്രേലിയയുടെ തകര്‍ച്ചയ്ക്ക് കാരമം. 45/6 എന്ന നിലയിലേക്ക് വീണ ടീമിനെ മാത്യു വെയിഡ്(36), ആഡം സംപ(36), വെസ് അഗര്‍(41) എന്നിവര്‍ ചേര്‍ന്നാണ് 187 റൺസിലേക്ക് എത്തിച്ചത്.
വിന്‍ഡീസിന്റെ തുടക്കവും തകര്‍ച്ചയായിരുന്നുവെങ്കിലും ഷായി ഹോപ്(38), നിക്കോളസ് പൂരന്‍(59), ജേസൺ ഹോള്‍ഡര്‍(52) എന്നിവരാണ് ടീമിന്റെ വിജയം ഉറപ്പാക്കിയത്. 72/5 എന്ന നിലയിൽ നിന്ന് പൂരന്‍ – ഹോള്‍ഡര്‍ കൂട്ടുകെട്ട് നേടിയ 93 റൺസ് കൂട്ടുകെട്ടാണ് മത്സരത്തിൽ നിര്‍ണ്ണായകമായത്.
ഓസ്ട്രേലിയയ്ക്ക് വേണ്ടി മിച്ചൽ സ്റ്റാര്‍ക്ക് മൂന്നും ആഡം സംപ രണ്ടും വിക്കറ്റ് നേടി.
