ഓസ്ട്രേലിയന്‍ വിക്കറ്റ് കീപ്പര്‍ താരം മാത്യൂ വെയ്ഡുമായി കരാറിലെത്തി ഇംഗ്ലീഷ് കൗണ്ടി ടീമായ സോമര്‍സെറ്റ്. കൗണ്ടി ചാമ്പ്യന്‍ഷിപ്പിലെ ആദ്യ ഏഴ് മത്സരങ്ങളിലാണ് താരത്തിനെ ടീം കരാറിലെത്തിച്ചിരിക്കുന്നത്. എന്നാല്‍ ക്രിക്കറ്റ് ഓസ്ട്രേലിയയില്‍ നിന്നുള്ള അനുമതിയും താരത്തിനുള്ള വിസയും ലഭിയ്ക്കേണ്ടതായിട്ടുണ്ട്.
ഓസ്ട്രേലിയയ്ക്കായി 30 ടെസ്റ്റുകളില്‍ കളിച്ചിട്ടുള്ള താരം 4 ശതകങ്ങള്‍ നേടിയിട്ടുണ്ട്. അടുത്ത് കാലത്തായി മികച്ച ഫോമിലുള്ള താരം ഓസ്ട്രേലിയന്‍ ടീമില്‍ സ്പെഷ്യലിസ്റ്റ് ബാറ്റ്സ്മാനായാണ് സ്ഥാനം നേടിയിട്ടുള്ളത്. ആഷസില്‍ ഓസ്ട്രേലിയന്‍ നിരയില്‍ 337 റണ്‍സോടെ മൂന്നാം സ്ഥാനത്തായിരുന്നു താരം.
ഏപ്രിലില്‍ വാര്‍വിക്ക്ഷയറിനെതിരെയാണ് സോമര്‍സെറ്റിന്റെ ആദ്യ മത്സരം. പിച്ച് നിയന്ത്രണങ്ങള്‍ ലംഘിച്ചതിനെത്തുടര്‍ന്ന് ക്ലബ് 12 പോയിന്റ് പിന്നില്‍ നിന്നാവും സീസണ്‍ ആരംഭിക്കുന്നത്.
