പൂരനെ വീഴ്ത്തി റഷീദ് ഖാന്‍, സണ്‍റൈസേഴ്സിന് ആധികാരിക വിജയം

Rashidkhan
- Advertisement -

നിക്കോളസ് പൂരന്റെ വെടിക്കെട്ടിന് പിന്തുണ നല്‍കുവാന്‍ മറ്റു പഞ്ചാബ് ബാറ്റ്സ്മാന്മാര്‍ക്ക് സാധിക്കാതെ വന്നപ്പോള്‍ കിംഗ്സ് ഇലവന്‍ പഞ്ചാബിനെതിരെ 69 റണ്‍സ് വിജയം കരസ്ഥമാക്കി സണ്‍റൈസേഴ്സ് ഹൈദ്രാബാദ്. 19 പന്തില്‍ തന്റെ അര്‍ദ്ധ ശതകം പൂര്‍ത്തിയാക്കിയ നിക്കോളസ് പൂരന്‍ തന്റെ ചുറ്റും വിക്കറ്റുകള്‍ വീണുകൊണ്ടിരുന്നപ്പോളും ഒരു വശത്ത് സ്കോറിംഗുമായി മുന്നോട്ട് പോയി. റഷീദ് ഖാന്‍ താരത്തെ പുറത്താക്കിയപ്പോള്‍ 37 പന്തില്‍ നിന്ന് 77 റണ്‍സ് നേടിയാണ് പൂരന്‍ മടങ്ങിയത്. 5 ഫോറും 7 സിക്സും അടങ്ങിയതായിരുന്നു പൂരന്റെ ഇന്നിംഗ്സ്.

Nicholas Pooran

പൂരന്റെ ബാറ്റിംഗ് മികവില്‍ 10 ഓവറില്‍ നിന്ന് 96 റണ്‍സിലേക്ക് കിംഗ്സ് ഇലവന്‍ പഞ്ചാബിനെ എത്തിയ്ക്കുകയായിരുന്നു. അപകടകാരിയായ മാക്സ്വെല്ലിനെ പ്രിയം ഗാര്‍ഗ് റണ്ണൗട്ടാക്കിയതോടെ പഞ്ചാബിന് നാലാം വിക്കറ്റും നഷ്ടമായി. റഷീദ് ഖാനെ രംഗത്തിറക്കി ഡേവിഡ് വാര്‍ണര്‍ മന്‍ദീപ് സിംഗിനെയും മടക്കിയതോടെ 115/5 എന്ന നിലയിലേക്ക് പഞ്ചാബ് വീണു.

പൂരനെയും ഷമിയെയും പുറത്താക്കി ഡബിള്‍ വിക്കറ്റ് മെയ്ഡന്‍ നേടിയ റഷീദ് ഖാന്‍ പഞ്ചാബിന്റ തോല്‍വി വേഗത്തിലാക്കുകയായിരുന്നു. അവസാന രണ്ട് വിക്കറ്റുകളും നേടിയത് ടി നടരാജനായിരുന്നു. 16.5 ഓവറില്‍ 132 റണ്‍സിനാണ് കിംഗ്സ് ഇലവന്‍ പഞ്ചാബ് ഓള്‍ഔട്ട് ആയത്. നാലോവറില്‍ വെറും 12 റണ്‍സ് വിട്ട് നല്‍കിയാണ് റഷീദ് ഖാന്‍ തന്റെ മൂന്ന് വിക്കറ്റ് നേടിയത്. ഖലീല്‍ അഹമ്മദിന് രണ്ട് വിക്കറ്റ് ലഭിച്ചു.

 

Advertisement