ഐപിഎല്‍ 2019 ആരംഭിക്കുന്നതിനു ഒരു ദിവസം മുമ്പ് സണ്‍റൈസേഴ്സ് ഹൈദ്രാബാദിന്റെ നായകന്‍ കെയിന്‍ വില്യംസണ്‍ ടീമിനൊപ്പം ചേരുമെന്ന് വ്യക്തമാക്കി ടീം ഫ്രാഞ്ചൈസി. സ്വന്തം നാട്ടുകാരനായ മാര്‍ട്ടിന്‍ ഗുപ്ടിലിനൊപ്പം കെയിന്‍ വില്യംസണ്‍ ടീമിനൊപ്പം മാര്‍ച്ച് 22നു ചേരുമെന്നാണ് ലഭിയ്ക്കുന്ന വിവരം. പരിക്ക് മൂലം കരുതലെന്ന് നിലയില്‍ താരത്തെ ബംഗ്ലാദേശിനെതിരെ മൂന്നാം ടെസ്റ്റില്‍ പങ്കെടുപ്പിക്കേണ്ട എന്നായിരുന്നു ന്യൂസിലാണ്ടിന്റെ തീരുമാനം. പിന്നീട് ക്രൈസ്റ്റ്ചര്‍ച്ചിലെ ആക്രമണത്തെത്തുടര്‍ന്ന് മത്സരം തന്നെ ഉപേക്ഷിക്കപ്പെടുകയായിരുന്നു. ലോകകപ്പ് വരുന്നതിനാല്‍ താരം ഐപിഎല്‍ കളിച്ചേക്കില്ലെന്ന തരത്തില്‍ വാര്‍ത്തകള്‍ വന്നിരുന്നുവെങ്കിലും ഇപ്പോള്‍ സണ്‍റൈസേഴ്സിനു ആശ്വാസം നല്‍കുന്ന വാര്‍ത്തയാണ് എത്തുന്നത്.
We know you’ve been wondering when Kane Williamson & @Martyguptill will join the #RiserCamp! Well we don't like keeping our #OrangeArmy in the dark. They'll be joining us on the 22nd after the New Zealand Cricket Awards. So sit tight guys! 😎
— SunRisers Hyderabad (@SunRisers) March 20, 2019
ന്യൂസിലാണ്ട് ക്രിക്കറ്റ് അവാര്‍ഡ് ചടങ്ങിനു ശേഷമാവും ഐപിഎലിലേക്ക് താരം എത്തുന്നത്. സണ്‍റൈസേഴ്സ് ആരാധകര്‍ക്കായി തങ്ങളുടെ ട്വിറ്റര്‍ ഹാന്‍ഡിലിലൂടെയാണ് ഫ്രാഞ്ചൈസി ഈ വാര്‍ത്ത നല്‍കിയത്. ഞായറാഴ്ച് കൊല്‍ക്കത്ത നൈറ്റ് റൈഡേഴ്സിനെതിരെയാണ് ടീമിന്റെ ആദ്യ മത്സരം. കഴിഞ്ഞ സീസണില്‍ ഏറ്റവും അധികം റണ്‍സ് നേടിയ താരമാണ് കെയിന്‍ വില്യംസണ്‍.
എന്നാല്‍ ആദ്യ മത്സരത്തില്‍ താരം കളിക്കുമോ എന്നത് കാത്തിരുന്ന് മാത്രമേ അറിയുവാന്‍ സാധിക്കുള്ളു. നീണ്ട യാത്ര കഴിഞ്ഞെത്തുന്ന ഉടനെ വില്യംസണും ഗുപ്ടിലും കളിക്കാനെത്തുമോ എന്നാണ് സണ്‍റൈസേഴ്സ് ആരാധകരും ഉറ്റുനോക്കുന്നത്.
