ലക്നൗവിനെതിരെ 257 റൺസ് വഴങ്ങിയ പഞ്ചാബ് ബൗളര്‍മാര്‍ ശക്തമായി തന്നെ തിരിച്ചുവരുമെന്ന് പറഞ്ഞ് വസീം ജാഫര്‍. ലക്നൗവിനെതിരെ 56 റൺസിന്റെ പരാജയം ആണ് പഞ്ചാബ് ഏറ്റുവാങ്ങിയത്. ടീമിന്റെ മുന്‍ നിര പേസര്‍മാരായ സാം കറന്‍, അര്‍ഷ്ദീപ് സിംഗ്, കാഗിസോ റബാഡ എന്നിവര്‍ 11 ഓവറിൽ നിന്ന് 144 റൺസാണ് വഴങ്ങിയത്.
ഈ ഒരൊറ്റ കളിയിലെ പ്രകടനം വെച്ച് വലിയ പ്രശ്നമുള്ളതായി കരുതേണ്ടതില്ലെന്നും മൂന്ന് മത്സരത്തിൽ കഠിനമായ സാഹചര്യങ്ങളിൽ ഈ ബൗളര്‍മാര്‍ ടീമിനെ വിജയത്തിലേക്ക് നയിച്ചിട്ടുണ്ടെന്നും വസീം ജാഫര്‍ പറഞ്ഞു. മുംബൈ, രാജസ്ഥാന്‍, കൊൽക്കത്ത മത്സരങ്ങള്‍ എല്ലാം ബൗളിംഗ് ടീമിന്റെ മികവ് കാണിക്കുന്ന മത്സരങ്ങളാണെന്നും വസീം ജാഫര്‍ പറഞ്ഞു.
ഈ സീസണിൽ ഉടനീളം ബൗളിംഗ് ടീം മികവ് പുലര്‍ത്തിയിട്ടുണ്ടെന്നും ഒരു മത്സരത്തിലെ മോശം പ്രകടനം വെച്ച് അവരെ വിലയിരുത്തരുതെന്നും ജാഫര്‍ സൂചിപ്പിച്ചു.
