ക്രൈസ്റ്റ്ചര്‍ച്ചില്‍ ഇന്ത്യയുടെ ബാറ്റിംഗ് പരാജയത്തിന് ശേഷം മികച്ച തുടക്കം നേടിയ ന്യൂസിലാണ്ടിനെ എറിഞ്ഞിട്ട് ഇന്ത്യന്‍ ബൗളര്‍മാര്‍. തലേ ദിവസത്തെ സ്കോറായ 63/0 എന്ന നിലയില്‍ ബാറ്റിംഗ് ആരംഭിച്ച ന്യൂസിലാണ്ടിനെ 235 റണ്‍സിന് പുറത്താക്കിയാണ് ഇന്ത്യ മത്സരത്തില്‍ 7 റണ്‍സിന്റെ ഒന്നാം ഇന്നിംഗ്സ് ലീഡ് നേടിയത്. 49 റണ്‍സുമായി വാലറ്റത്തില്‍ പൊുതിയ കൈല്‍ ജൈമിസണാണ് ഇന്ത്യയുടെ ലീഡ് കുറച്ച് കൊണ്ടുവന്നത്. അര്‍ദ്ധ ശതകം നേടിയ ടോം ലാഥം ആണ് മറ്റൊരു പ്രധാന സ്കോറര്‍. 52 റണ്‍സാണ് ലാഥം നേടിയത്.
മുഹമ്മദ് ഷമി 4 വിക്കറ്റും ജസ്പ്രീത് ബുംറ മൂന്ന് വിക്കറ്റും നേടിയാണ് ന്യൂസിലാണ്ടിന് കനത്ത പ്രഹരങ്ങള്‍ നല്‍കിയത്. 177/8 എന്ന നിലയില്‍ തകര്‍ന്നടിഞ്ഞ ന്യൂസിലാണ്ടിന് 9ാം വിക്കറ്റില്‍ നിര്‍ണ്ണായകമായ 51 റണ്‍സ് നേടിയ ജൈമിസണ്‍-നീല്‍ വാഗ്നര്‍(21) കൂട്ടുകെട്ടിന്റെ പ്രകടനം എടുത്ത് പറയേണ്ടതാണ്. കോളിന്‍ ഡി ഗ്രാന്‍ഡോം 26 റണ്‍സ് നേടി. ഇന്നിംഗ്സിലെ അവസാന വിക്കറ്റായാണ് കൈല്‍ ജൈമിസണ്‍ മടങ്ങിയത്.
