മുൻ ഇന്ത്യൻ ക്യാപ്റ്റൻ മഹേന്ദ്ര സിങ് ധോണിയെ ഇന്ത്യൻ ടീമിന് ഇപ്പോഴും ആവശ്യമുണ്ടെന്ന് മുൻ ഇന്ത്യൻ താരം സുരേഷ് റെയ്ന. എന്നാൽ ഇന്ത്യൻ ടീമിൽ ഉൾപെടുത്തണമോ വേണ്ടയോ എന്ന് തീരുമാനിക്കേണ്ടത് ഇന്ത്യൻ ക്യാപ്റ്റൻ വിരാട് കോഹ്‌ലിയാണെന്നും സുരേഷ് റെയ്ന പറഞ്ഞു.
അതെ സമയം ധോണി ക്രിക്കറ്റിൽ നിന്ന് വിരമിക്കികയായണെങ്കിൽ അധികം ബഹളങ്ങൾ ഒന്നും ഇല്ലാതെ ധോണി അത് ചെയ്യുമെന്നും റെയ്ന പറഞ്ഞു. ധോണി ഇനിയും കളിക്കണമെന്നാണ് തന്റെ ആഗ്രഹമെന്നും ധോണി വളരെ മികച്ച രീതിയിൽ പരിശീലനം നടത്തുന്നുണ്ടെന്നും താരം പൂർണ്ണമായും ഫിറ്റ് ആണെന്നും റെയ്ന പറഞ്ഞു.
കഴിഞ്ഞ ലോകകപ്പ് സെമി ഫൈനലിൽ ന്യൂസിലാൻഡിനോട് തോറ്റതിന് ശേഷം ധോണി ഇന്ത്യക്ക് വേണ്ടി കളിച്ചിട്ടില്ല. അടുത്തിടെ ജാർഖണ്ഡ് രഞ്ജി ടീമിനൊപ്പം പരിശീലനം ആരംഭിച്ച ധോണി ഇന്ത്യൻ പ്രീമിയർ ലീഗിൽകൂടി ക്രിക്കറ്റിലേക്ക് തിരിച്ചുവരാനുള്ള ശ്രമം തുടങ്ങിയിരുന്നു.
