വിന്‍ഡീസ് എ യ്ക്കെതിരെ ആദ്യ രണ്ട് മത്സരങ്ങളിലും 65 റണ്‍സിന്റെ വിജയം കരസ്ഥമാക്കിയ ഇന്ത്യ ഇന്ന് പരമ്പര സ്വന്തമാക്കുവാനായി ഇറങ്ങുന്നു. ആദ്യ മത്സരത്തില്‍ ബാറ്റിംഗ് തകര്‍ച്ച നേരിട്ട ശേഷം ശ്രേയസ്സ് അയ്യര്‍ ബാറ്റിംഗിലും ഖലീല്‍ അഹമ്മദ് ബൗളിംഗിലും തിളങ്ങിയപ്പോള്‍ രണ്ടാം മത്സരത്തില്‍ റുതുരാജ് ഗായക്വാഡും(85) ശുഭ്മന്‍ ഗില്ലും(62) ടോപ് ഓര്‍ഡറില്‍ തിളങ്ങിയതിന്റെ ബലത്തില്‍ ഇന്ത്യ 50 ഓവറില്‍ നിന്ന് 8 വിക്കറ്റ് നഷ്ടത്തില്‍ 255 റണ്‍സ് നേടുകയായിരുന്നു. മറുപടി ബാറ്റിംഗിനിറങ്ങിയ വിന്‍ഡീസിനെ 43.5 ഓവറില്‍ 190 റണ്‍സിന് ഇന്ത്യ ഓള്‍ഔട്ട് ആക്കി. 71 റണ്‍സുമായി റേമണ്‍ റീഫര്‍ വിന്‍ഡീസ് നിരയിലെ ടോപ് സ്കോറര്‍ ആയി നിന്നപ്പോള്‍ റൊമാരിയോ ഷെപ്പേര്‍ഡ് പുറത്താകാതെ 34 റണ്‍സ് നേടി. ഇന്ത്യയ്ക്കായി നവ്ദീപ് സൈനി അഞ്ച് വിക്കറ്റ് നേടി തിളങ്ങി.
കഴിഞ്ഞ മത്സരം നടന്ന ആന്റിഗ്വയിലെ സര്‍ വിവിയന്‍ റിച്ചാര്‍ഡ്സ് സ്റ്റേഡിയത്തില്‍ ഇന്ത്യന്‍ സമയം ഏഴ് മണിക്കാണ് ഇന്ന് മത്സരം നടക്കുക. ഇവിടുത്തെ പിച്ച് ബാറ്റിംഗിന് അനുകൂലമാകുമെന്നാണ് പ്രതീക്ഷിക്കപ്പെടുന്നത്.
