തന്റെ ഏകദിന അരങ്ങേറ്റത്തില്‍ റീസ ഹെന്‍ഡ്രിക്സ് നേടിയ 102 റണ്‍സിന്റെയും അര്‍ദ്ധ ശതകങ്ങള്‍ നേടിയ ഹാഷിം അംല(59), ജീന്‍ പോള്‍ ഡുമിനി(92), ഡേവിഡ് മില്ലര്‍(51) എന്നിവരുടെ ബാറ്റിംഗ് പ്രകടനത്തില്‍ ശ്രീലങ്കയ്ക്കെതിരെ മികച്ച സ്കോര്‍ നേടി ദക്ഷിണാഫ്രിക്ക. മത്സരത്തില്‍ ടോസ് നേടി ശ്രീലങ്ക ബൗളിംഗ് തിരഞ്ഞെടുത്തു. ആദ്യം ബാറ്റ് ചെയ്ത ദക്ഷിണാഫ്രിക്ക 50 ഓവറില്‍ 7 വിക്കറ്റുകളുടെ നഷ്ടത്തില്‍ 363 റണ്‍സാണ് നേടിയത്.
പരിക്കില്‍ നിന്ന് തിരിച്ചെത്തിയ ലഹിരു കുമര ആറാം ഓവറില്‍ 2 റണ്‍സ് നേടിയ ക്വിന്റണ്‍ ഡിക്കോക്കിനെ പുറത്താക്കുമ്പോള്‍ ദക്ഷിണാഫ്രിക്ക 42 റണ്‍സാണ് ഒന്നാം വിക്കറ്റില്‍ നേടിയത്. രണ്ടാം വിക്കറ്റില്‍ റീസ ഹെന്‍റിക്സുമായി ചേര്‍ന്ന് ഹാഷിം അംല(59) നേടിയത് 59 റണ്‍സാണ്. ഫാഫ് ഡു പ്ലെസി(10) വേഗത്തില്‍ പുറത്തായെങ്കിലും പിന്നീടുള്ള ബാറ്റ്സ്മാന്മാര്‍ തകര്‍ത്തടിച്ച് ദക്ഷിണാഫ്രിക്കയുടെ സ്കോര്‍ 300 കടത്തുകയായിരുന്നു.
103 റണ്‍സാണ് അഞ്ചാം വിക്കറ്റില്‍ ഡുമിനി-മില്ലര്‍ കൂട്ടുകെട്ട് നേടിയത്. 70 പന്തില്‍ നിന്ന് 92 റണ്‍സ് നേടി ഡുമിനി പുറത്താകുമ്പോള്‍ 8 ബൗണ്ടറിയും ആറ് സിക്സും നേടിയിരുന്നു. മില്ലര്‍ 51 റണ്‍സ് നേടി. ആന്‍ഡിലെ ഫെഹ്ലുക്വായോ 11 പന്തില്‍ നിന്ന് 24 റണ്‍സ് നേടി പുറത്താകാതെ നിന്നു.
ശ്രീലങ്കയ്ക്കായി തിസാര പെരേര മൂന്നും ലഹിരു കുമര രണ്ടും വിക്കറ്റാണ് നേടിയത്.
കൂടുതൽ കായിക വാർത്തകൾക്ക് : www.facebook.com/FanportOfficial
