Local Sports News in Malayalam

ഐസിസിയ്ക്ക് ബിസിസിഐയുടെ ഉറപ്പ്, പാക് താരങ്ങള്‍ക്ക് ലോകകപ്പിനുള്ള വിസ നല്‍കും

പാക്കിസ്ഥാന്‍ താരങ്ങള്‍ക്ക് 2021 ടി20 ലോകകപ്പില്‍ പങ്കെടുക്കുവാനുള്ള വിസ ഉറപ്പായും നല്‍കുമെന്ന് അറിയിച്ച് ബിസിസിഐ. ഐസിസിയോടാണ് ബിസിസിഐ ഈ ഉറപ്പ് നല്‍കിരിക്കുന്നത്.

ലോകകപ്പ് ഇന്ത്യയില്‍ നടക്കാനിരിക്കെ ഇരു രാജ്യങ്ങളും തമ്മിലുള്ള ബന്ധം മോശമായി തുടരുന്നതിനാല്‍ തന്നെ പാക്കിസ്ഥാന്‍ ക്രിക്കറ്റ് ബോര്‍ഡും മുന്‍ ക്രിക്കറ്റ് താരങ്ങളും പാക്കിസ്ഥാന്റെ പങ്കാളിത്തത്തെ ബാധിക്കുമോ എന്ന കാര്യം പങ്കുവെച്ചിരുന്നു.

അതിനാല്‍ തന്നെ ബിസിസിഐയില്‍ നിന്ന് രേഖാമൂലമുള്ള അറിയിപ്പ് ഇതിന്മേല്‍ വേണമെന്നാണ് പാക്കിസ്ഥാന്‍ ബോര്‍ഡ് ആവശ്യപ്പെട്ടത്. ഇല്ലാത്ത പക്ഷം ഇന്ത്യയില്‍ നിന്ന് വേദി യുഎഇയിലേക്ക് മാറ്റണമെന്നും പാക്കിസ്ഥാന്‍ ക്രിക്കറ്റ് ബോര്‍ഡ് ആവശ്യപ്പെട്ടിരുന്നു.

ക്രിക്കറ്റ് താരങ്ങള്‍ക്ക് മാത്രമല്ല ആരാധകര്‍ക്കും ഒഫീഷ്യലുകള്‍ക്കും ജേര്‍ണലിസ്റ്റുകള്‍ക്കും ഇന്ത്യന്‍ സര്‍ക്കാര്‍ വിസ നല്‍കണമെന്നാണ് പിസിബിയുടെ ആവശ്യം. 2016ല്‍ പാക്കിസ്ഥാന്‍ ഐസിസി ലോകകപ്പില്‍ പങ്കെടുക്കുന്നതിനായി ഇന്ത്യ സന്ദര്‍ശിച്ചിട്ടുണ്ട്.

You might also like