ഇന്ത്യയ്ക്കെതിരെ രണ്ടാം ടി20യില്‍ ആദ്യം ബാറ്റ് ചെയ്ത ഓസ്ട്രേലിയയ്ക്ക് കൂറ്റന്‍ സ്കോര്‍. 32 പന്തില്‍ നിന്ന് 58 റണ്‍സ് നേടിയ മാത്യൂ വെയിഡും 38 പന്തില്‍ നിന്ന് 46 റണ്‍സ് നേടിയ സ്റ്റീവന്‍ സ്മിത്തും തിളങ്ങിയപ്പോള്‍ ഗ്ലെന്‍ മാക്സ്വെല്ലും(22) മോയിസസ് ഹെന്‍റിക്സുമെല്ലാം(26) നിര്‍ണ്ണായക പ്രകടനങ്ങളാണ് പുറത്തെടുത്തത്. 20 ഓവറില്‍ 5 വിക്കറ്റ് നഷ്ടത്തില്‍ 194 റണ്‍സാണ് ഓസ്ട്രേലിയ നേടിയത്. മാര്‍ക്കസ് സ്റ്റോയിനിസ്(16*), ഡാനിയേല്‍ സാംസ്(8*) എന്നിവരും അവസാന ഓവറുകളില്‍ റണ്‍ വാരിക്കൂട്ടുകയായിരുന്നു.
ഓപ്പണിംഗ് കൂട്ടുകെട്ടില്‍ ഡാര്‍സി ഷോര്‍ട്ടിനെ കാഴ്ചക്കാരനാക്കി മാത്യൂ വെയിഡ് ഇന്ത്യന്‍ ബൗളര്‍മാരെ കണക്കറ്റ് പ്രഹരിക്കുകയായിരുന്നു. 47 റണ്‍സ് ആണ് കൂട്ടുകെട്ട് നേടിയത്. വെയിഡ് പുറത്തായ ശേഷം സ്മിത്തിനായിരുന്നു ഓസ്ട്രേലിയന്‍ ഇന്നിംഗ്സ് മുന്നോട്ട് നയിക്കുവാനുള്ള ദൗത്യം.
9 പന്തില്‍ നിന്ന് 23 റണ്‍സുമായി മാര്‍ക്കസ് സ്റ്റോയിനിസും ഡാനിയേല്‍ സാംസും ഒപ്പം കൂടിയപ്പോള്‍ ഓസ്ട്രേലിയ ഇന്ത്യയ്ക്ക് വലിയ വെല്ലുവിളി ഉയര്‍ത്തുന്ന സ്കോര്‍ നേടുകയായിരുന്നു. ഇന്ത്യന്‍ നിരയില്‍ നാലോവറില്‍ വെറും 20 റണ്‍സ് വിട്ട് നല്‍കി രണ്ട് വിക്കറ്റ് നേടിയ നടരാജന്റെ പ്രകടനമാണ് മികച്ച് നിന്നത്.
