അമ്മയായ ശേഷമുള്ള തിരിച്ചു വരവിൽ വിംബിൾഡൺ സെമിയിലേക്ക് മുന്നേറി ബെലിന്ത ബെനചിച്

കഴിഞ്ഞ ഏപ്രിലിൽ കുഞ്ഞിന് ജന്മം നൽകിയ ശേഷമുള്ള കളിക്കളത്തിലേക്കുള്ള മടങ്ങിവരവിൽ വിംബിൾഡൺ സെമിഫൈനലിലേക്ക് മുന്നേറി സ്വിസ് താരം ബെലിന്ത ബെനചിച്. സീഡ് ചെയ്യാത്ത താരം ഏഴാം സീഡ് 17 കാരിയായ മിറ ആന്ദ്രീവയെ 2 ടൈബ്രേക്കറുകൾ കണ്ട മത്സരത്തിൽ 7-6, 7-6 എന്ന സ്കോറിന് ആണ് തോൽപ്പിച്ചത്. 2019 ലെ യു.എസ് ഓപ്പണിന് ശേഷം കരിയറിലെ ആദ്യ ഗ്രാന്റ് സ്ലാം സെമിഫൈനൽ ആണ് സ്വിസ് താരത്തിന് ഇത്.

മകൾക്ക് ജന്മം നൽകിയ ശേഷം ആറു മാസത്തെ ഇടവേളയ്ക്ക് ശേഷം കളത്തിലേക്ക് തിരിച്ചു വന്ന ബെലിന്ത ഈ വർഷം തുടങ്ങിയത് 489 മത്തെ റാങ്കുകാരിയായാണ്. തുടർന്ന് റാങ്കിങ്ങിൽ വലിയ മുന്നേറ്റം ഉണ്ടാക്കി 35 മത്തെ റാങ്കുവരെയെത്തിയ മുൻ ഒളിമ്പിക് സ്വർണ മെഡൽ ജേതാവ് കൂടിയായ ബെലിന്ത ഏഴാം സീഡിനെ അട്ടിമറിച്ചു തന്റെ കാലം കഴിഞ്ഞിട്ടില്ല എന്നു തന്നെയാണ് തെളിയിച്ചത്.